بنگلورو،7؍اکتوبر(ایس او نیوز) ریاستی بی جے پی صدر بی ایس یڈیورپا نے وزیر اعلیٰ سدرامیا سے مطالبہ کیا ہے کہ حکومت کی طرف سے پسماندہ طبقات ، دلتوں اور اقلیتوں کیلئے جو فلاحی منصوبے لاگو کئے گئے ہیں اور ان پر جو رقم صرف کی گئی ہے اس سلسلے میں قرطاس ابیض جاری کیا جائے۔آج بی جے پی کے اہندا مورچہ کی مجلس عاملہ کا افتتاح کرتے ہوئے انہوں نے کہاکہ وزیر اعلیٰ خود کو پسماندہ طبقات کا مسیحا قرار دیتے ہیں ، لیکن ان طبقات کی فلاح کیلئے وزیر اعلیٰ سدرامیا نے کچھ نہیں کیا ہے اور اگر کیا ہے تو اسکیموں کے نفاذ اور فنڈز کے اصراف کے متعلق قرطاس ابیض جاری کیا جائے ۔ یڈیورپا نے کہا کہ پچھلے چار سال کے دوران سدرامیا حکومت کرپشن ، گھپلوں ، اقتدار کے غلط استعمال ، اقرباء پروری ، مختلف ذاتوں کے درمیان ٹکراؤ ، نظم وضبط میں بگاڑ ، خواتین کو عدم تحفظ کے علاوہ کچھ نہیں کرپائی ہے۔ پسماندہ طبقات کو کانگریس نے محض ووٹ بینک بناکر رکھ دیا ہے۔بجٹ میں بڑے بڑے منصوبوں کا اعلان تو ہوا، لیکن ان پر عمل نہیں کیاگیا۔انہوں نے کہاکہ ریاست میں بی جے پی حکومت اگر اقتدار پر آئی تو مرکزی حکومت کی طرف سے پسماندہ طبقات کی فلاح کیلئے اپنائے گئے منصوبے روبہ عمل لائے جائیں گے۔اس کے ساتھ ہی ڈجیٹل انڈیا، جن دھن ، اسکیل انڈیا وغیرہ سے عوام کو فائدہ پہنچایا جائے گا۔ انہوں نے کہاکہ وزیر اعلیٰ سدرامیا کا اخلاقی دیوالیہ پن اسی بات سے ظاہر ہوگیا کہ وہ سابق ریاستی وزیر ایچ وشواناتھ کے متعلق توہین آمیز بیان دینے پر اتر آئے، جبکہ سدرامیا کو کانگریس میں لانے اور انہیں اقتدار تک پہنچانے میں کلیدی رول وشواناتھ کا رہا ، اپنے اسی رفیق کے ساتھ دغا کرنے والے سدرامیا پسماندہ طبقات کے مسیحا کیسے بن سکتے ہیں؟۔ یڈیورپا نے دعویٰ کیا کہ ان کے دوراقتدار میں حکومت نے پسماندہ طبقات کیلئے بہت سارے فلاحی منصوبے مرتب کئے اور ان کو عملی جامہ پہنایا۔ صحافی گوری لنکیش کے قتل کو ہندو تنظیم سناتن سنستھا سے جوڑے جانے پر شدید برہمی کا اظہار کرتے ہوئے یڈیورپا نے کہاکہ اس سے ظاہرہوتا ہے کہ گوری لنکیش کے قتل پر گندی سیاست کرنا چاہتے ہیں اسے برداشت نہیں کیا جائے گا۔ ایک طرف وزیر داخلہ رام لنگا ریڈی یہ کہہ کر عوام کو گمراہ کررہے ہیں کہ گوری لنکیش کے قتل کے کیس میں خصوصی تحقیقاتی ٹیم کو سراغ مل چکا ہے تو دوسری طرف یہ کہا جارہا ہے کہ اس معاملے کی جانچ ابھی آگے بڑھ رہی ہے۔ انہوں نے کہاکہ اس معاملے میں حکومت دوہرے معیار کا مظاہرہ کررہی ہے۔