بنگلورو:4/ اگست(ایس  او نیوز) ریاستی اسمبلی کے اپوزیشن لیڈر جگدیش شٹر نے کہاکہ وزیر توانائی شیوکمار کی رہائش گاہ اور دیگر ٹھکانوں پر انکم ٹیکس کے چھاپوں کا سیاسی حالات سے کچھ بھی لینا دینا نہیں ہے۔ اخباری نمائندوں سے بات چیت کرتے ہوئے انہوں نے کہاکہ ڈی کے شیوکمار کو اگر اتنا یقین ہے کہ ان سے کوئی غلطی نہیں ہوئی ہے تو پھر انہیں اس قدر خوفزدہ ہونے کی ضرورت نہیں ہے۔انہوں نے کہاکہ انکم ٹیکس کے چھاپے کوئی نئی بات نہیں ہے، شہر کے کئی تجارتی گھرانوں ، اہم شخصیات وغیرہ کے مقامات پر اس سے پہلے بھی چھاپے پڑ چکے ہیں ، جب ان مقامات پر چھاپے پڑتے ہیں تو یہ موضوع بحث نہیں بنتے ، کسی سیاست دان کو جب نشانہ بنایا جاتاہے تو یہ چھاپے موضوع بحث بن جاتے ہیں، ڈی کے شیوکمار کی تجارت اور لین دین وغیر اگر قانون کے دائرہ میں ہے تو انہیں ڈرنے کی کوئی ضرورت نہیں۔ انہوں نے دعویٰ کیا کہ ان انکم ٹیکس چھاپوں کا بی جے پی سے کوئی تعلق نہیں ہے، محکمۂ انکم ٹیکس آزاد ہے ، مرکزی حکومت نے اسے مکمل خود مختاری دی ہے۔ گجرات اراکین اسمبلی کو انکم ٹیکس افسران کی طرف سے پندرہ کروڑ روپیوں کے لالچ کے الزام کو بے بنیاد قرار دیتے ہوئے انہوں نے کہا کہ سیاسی فائدہ کیلئے اس طرح کی بیہودہ باتیں عام نہیں کی جانی چاہئے۔