بنگلورو،6؍مارچ(ایس او نیوز) بروہت بنگلورو مہا نگرا پالیکے (بی بی ایم پی) کے تعلق سے عام طور پر یہ دیکھا جاتا ہے اور عوام کا بار بار کا تجربہ بھی ہے کہ وہ کاموں کی تکمیل میں کافی سست روی کا مظاہرہ کر تی ہے مگر بنگلور کے شہریوں کے لئے یہ بات حیرت انگیز رہی کہ بلدیہ نے شہر کے 92 مختلف راستوں کو وائٹ ٹاپنگ والے بنانے کے سلسلہ میں کس تیز رفتاری کے ساتھ ٹینڈر طلب کئے، اور صلاح کار کمپنیوں کی مدد حاصل کر تے ہوئے صرف دو ہفتوں کے اندر تفصیلی منصوبہ جاتی رپورٹ تیار کرالی اور ڈی پی آر کے داخلہ سے قبل ہی کاموں کے سلسلہ میں بھی ٹینڈر طلب کر لیا ہے۔بی بی ایم پی کی اس حیرت انگیز رفتار نے خود افسران اور شہری ماہرین کو دنگ کر دیا ہے۔1000 کروڑ روپئے لاگت کا یہ منصوبہ امید کی جا رہی ہے کہ پچھلے بجٹ میں منظور کر دہ دوسرے منصوبوں کو بی بی ایم پی کی طرف سے مکمل کئے جانے سے پہلے ہی شروع کر لیا جائے گا۔ریاستی حکومت نے یکم فروری کو مختلف شہری ترقیات کے کاموں کو منظوری دی تھی اور بی بی ایم پی نے 8 فروری کو ڈی پی آر کی تیاری کے لئے ٹینڈر طلب کر لئے۔ڈی پی آر کی تیاری پر کام کا آغاز 18 فروری کو مختلف بولیاں کھولی جانے کے بعد دوسرے ہی دن 19 فروری کو ہو گیا۔ دلچسپ بات یہ ہے کہ ڈی پی آر داخل کرنے کے سلسلہ میں متعینہ وقت سے قبل ہی ہفتہ کے دن بی بی ایم پی نے ٹینڈر شور کے ان راستوں پر کام کے آغاز کے لئے ہدایت نامے جاری کر دئے ہیں۔