بنگلورو20؍فروری (ایس او نیوز) ریاستی وزیر برائے دیہی ترقیات اور پنچایت راج کرشنا بائرے گوڈا نے کہاکہ ریاست بھر میں آبی وسائل کے تحفظ کے لئے ’جل امرت ‘ اسکیم شروع کرنے کا فیصلہ کیاگیا ہے۔ انہوں نے کہاکہ اس اسکیم کے موثر نفاذ کے لئے کمیونٹی ہیلپ کے علاوہ پنچایت راج محکمہ کے اداروں، پرائیویٹ انجمنوں کارکنوں اور مقامی لوگوں کا تعاون حاصل کیا جائے گا۔ انہوں نے کہاکہ اس اسکیم کے تحت ریاست بھر میں آبی وسائل کے اعداد وشمار اکٹھا کئے جائیں گے۔ جیولوجیکل ریسرچ اور سیٹلائٹ کی مدد سے آبی وسائل کا پتالگایا جائے گا۔ آبی وسائل میں پانی کی دستیابی اور ذخیرہ کی گنجائش بڑھانے کے لئے جدید تکنالوجی کا استعمال کیا جائے گا۔ انہوں نے کہاکہ ہماری لاپروائی کی وجہ سے ندیاں، تالاب، جھیل اور نالوں جیسے آبی وسائل ناپید ہوتے جارہے ہیں۔ اس اسکیم کے تحت گرام ، تعلقہ ضلع پنچایت سطح پر خصوصی مہم چلائی جائے گی اور پانی کے تحفظ کے بارے میں عوامی بیداری لانے اور آبی وسائل کی پانی کے ذخیرہ کی گنجائش بڑھانے کے لئے اقدامات کئے جائیں گے۔ تالابوں اورجھیلوں کے حدود حقیقی ذخیرہ کی گنجائش اور ان پر غیر قانونی قبضہ جات کے ریکارڈ تیارکئے جائیں گے۔ چیک ڈیم ، اینی ٹینک اور چھوٹے تالاب بنائے جائیں گے۔ انہوں نے کہاکہ اگلے دو برسوں میں 12؍ہزار چیک ڈیم تعمیر کرنے کا نشانہ مقررکیاگیا ہے۔ جل امرت اسکیم کے تحت ہر ضلع میں مقامی طور پر منصوبے بناکر شجرکاری کے ذریعہ آبی وسائل کی تجدید اور نئے وسائل پیدا کرنے کے لئے اقدامات کئے جائیں گے۔ انہوں نے کہاکہ ریاستی حکومت نے رواں سال کو ’’واٹر ایئر‘‘ (پانی کا سال) قرار دینے کا بھی فیصلہ کیا ہے۔