بنگلورو:22/جولائی (ایس او نیوز) عالمی سطح کے انسانی حقوق کارکن مارٹن لوتھر کنگ  سوم نے کہا ہے کہ سماج میں تبدیلی لانے عدم تشدد انسانی تاریخ کا سب سے موثر ہتھیار ثابت ہوا ہے۔تشدد سے کسی بھی سماج میں تبدیلی یا اصلاح نہیں ہوسکتی۔آج شہر میں جاری امبیڈکر انٹرنیشنل کانفرنس کے دوران ایک اخباری کانفرنس سے خطاب کرتے ہوئے انہوں نے کہا کہ گاندھی جی نے عدم تشدد کے ذریعہ ہندوستان جیسے بڑے ملک کو طاقتور انگریز حکومت سے آزاد کرایا، اس کے بعد سے دنیا کے مختلف ممالک میں عوام نے اسی راستے کو اپناکر اپنی کامیابی حاصل کی ہے۔ انہوں نے کہاکہ سماجی انصاف کے تقاضوں کو بدلتے وقت کے ساتھ بدلاجانا چاہئے، ورنہ سماج کے محروم طبقات کو مراعات فراہم کرنے حکومتوں کی پالیسیاں بے اثر ہوجائیں گی۔ ملک میں دلت تنظیموں کی غیر منظم حکمت عملیوں کو بے سود قرار دیتے ہوئے مارٹن لوتھر کنگ نے مشورہ دیا کہ ملک بھر کی دلت تنظیموں کو منظم اور متحد ہوکر کام کرنا چاہئے۔ انہوں  نے کہاکہ امریکہ میں سیاہ فام باشندوں کے حق میں انہوں نے جو احتجاجی تحریک چھیڑی اس کی کامیابی اتحاد کے نتیجہ میں ہی حاصل ہوپائی۔امبیڈ کر انٹرنیشنل کانفرنس کو سماج میں بدلاؤ کیلئے ایک اہم پہل قرار دیتے ہوئے انہوں نے کہاکہ اس سے کافی مدد ملے گی۔ ملک بھر میں گؤ رکشا کے نام پر بے قصوروں کے قتل عام اور انہیں برسر عام قتل کردئے جانے کے واقعات کو غیر انسانی اور وحشتناک قرار دیتے ہوئے مارٹن لوتھر نے کہاکہ اس طرح کے واقعات اگر بغیر رکاوٹ کے جاری رہیں تو منتخب نمائندوں پر سے عوام کا اعتماد اٹھ جائے گا، فوری طور پر ارباب اقتدار اس مسئلے کو سلجھانے کی جانب متوجہ ہوں۔حالانکہ وزیراعظم مودی نے بارہا گؤ رکشا کے نام پر جاری قتل کی وارداتوں کی سخت الفاظ میں تنقید کی اور اس میں ملوث عناصر کے خلاف کارروائی کی تنبیہہ بھی کی ہے، لیکن اس کو عملی شکل بھی دینے کی ضرورت ہے۔ انہوں نے کہاکہ حکومت کرناٹک کی طرف سے بابا صاحب امبیڈ کر کی 125ویں سالگرہ کی مناسبت سے بین الاقوامی کانفرنس کا اہتمام کرنے اور اس میں مفکرین، دانشوران اور دیگر اہم شخصیات کو یکجا کرنے کی جو پہل کی گئی ہے وہ قابل ستائش ہے۔