دھرم سبھا میں مودی کو دی گئی وارننگ ،اگر رام مندر تعمیر کرنے کا وعدہ پورا نہیں کیا تودوبارہ اقتدار پر نہیں آنے دیں گے
نئی دہلی،9دسمبر(ایس او نیوز/آئی این ایس انڈیا) وشیوہندو پریشد(وی ایچ پی)نے رام مندر تعمیر کرنے کے لئے اتوار کو رام لیلا میدان میں ایک دھرم سبھا کا اہتمام کیا ۔اس سے خطاب کرتے ہوئے سوامی پرمانند نے مودی حکومت کو خبردار کرتے ہوئے کہا کہ اگر نریندر مودی نے رام مندر کی تعمیر کا وعدہ پورا نہیں کیا تو پھر ہم اسے اقتدار میں آنے نہیں دیں گے۔انہوں نے کہا کہ ہم نہ ہی آپ کی کٹھ پتلی ہیں اور نہ ہی آپ سے ڈرتے ہیں۔دوسری طرف سادھوی تریتم بھرا نے کہا کہ میں ہندوؤں کو متحد رہنے کی اپیل کروں گی، ورنہ انہیں ان کا حق نہیں ملے گا۔ہندووں کے درمیان پریشانی یہ ہے کہ وہ ذات کے نام پر تقسیم ہیں۔انہوں نے کہا کہ ہم نے مرکز میں مودی اور یوپی میں یوگی کی حکومت بنائی۔یوگی نے ایودھیا کو روشن کرنے کا کام کیا، لیکن وہ جانتے ہیں کہ جب تک رام للا ایودھیا میں اپنا گھر نہیں پائیں گے، تب تک ملک کو امن نہیں مل سکتا۔
آر ایس ایس کے چیئرمین بھیاجی جوشی نے سبھا کو خطاب کرتے ہوئے کہا کہ ہم چاہتے ہیں کہ جو بھی ہو امن سے ہو،اگر جدوجہد کرنا ہوتا تو انتظار نہیں کرتے،اس لئے سبھی لوگ اس میں مثبت پہل کریں،ہماراکسی کے ساتھ کوئی جدوجہد نہیں ہے، رام راج میں ہی سکون ملتاہے،سب چاہتے ہیں کہ رام شاندارمندرمیں رہیں۔1992میں کام ادھورارہ گیا،ڈھانچہ گرالیکن مندرنہیں بنا،آئین کا راستہ باقی ہے،ہماری یہی خواہش ہے کہ قانون بناتے ہوئے رام مندر کی تمام رکاوٹیں دور ہوں، عدالت سے بھی یہی امید ہے کہ وہ جنم بھومی کا احترام کرے گی۔
بابری مسجدشہید کرنے کے کیس میں بی جے پی کے سینئر لیڈر ایل کے اڈوانی سمیت 13رہنماؤں میں سادھوی تریتم بھری بھی ملزمہ ہیں،تاہم اس معاملے کے بعدکئی لیڈرہائی پروفائل بن گئے، لیکن سادھوی ریتم بھری سیاسی طور پرلو وفائل رہ گئی۔2002میں ریاستی بی جے پی حکومت نے آشرم کیلئے انہیں 17ایکٹر زمین ایک روپے سالانہ کی فیس پر 99سال کیلئے لیز پر دیاتھا،جبکہ اس وقت اس زمین کی قیمت تقریبا 20کروڑ روپے تھی۔