یوپی اسمبلی سے ایس پی اوربی ایس پی ممبران کاواک آؤٹ
لکھنؤ27جولائی(ایس او نیوز/آئی این ایس انڈیا) اترپردیش قانون ساز کونسل میں آج ایس پی اوربی ایس پی ممبران نے مختلف مسائل کو لے کر ایوان سے واک آؤٹ کیاہے۔وقفہ صفرکے دوران ایس پی ارکان نے التواء کی تجویزکے ذریعے ریاست میں اساتذہ کے ایڈجسٹمنٹ کا معاملہ اٹھا۔ایس پی ارکان نے کہا کہ پچھلی ایس پی حکومت نے 12ہزار 460بی ٹی سی اساتذہ اور چار ہزار اردومعلم اساتذہ کی ایڈجسٹمنٹ کے لیے بھرتی کا عمل مکمل کرایاتھا لیکن اسمبلی انتخابات ضابطہ اخلاق لگ جانے کی وجہ سے نتائج کا اعلان نہیں ہوسکاتھا۔ایس پی ارکان نے کہا کہ بعد میں ریاست میں بی جے پی کی حکومت آ جانے پر نتائج روک دیے گئے ۔اس سے بیزار ٹی ای ٹی اساتذہ اور اردو معلم اساتذہ نے اپنے ایڈجسٹمنٹ کیلئے کئی بار احتجاجی مظاہرہ کیا لیکن موجودہ حکومت کی جابرانہ اور تعلیم مخالف پالیسی کی وجہ سے ان کی کوئی سنوائی نہیں ہورہی ہے۔اس موضوع پر ایوان کا باقی کام روک کر بحث کرائی جائے۔لیڈر ایوان نائب وزیراعلیٰ دنیش شرمانے کہاکہ پچھلے حکومت نے اساتذہ کے ایڈجسٹمنٹ میں جان بوجھ کرغلطی کی۔شاید ایس پی حکومت کی منشا رہی کہ اس میں اپنی طرف سے کمی رکھ دو اور بعد میں عدالت اس پر روک لگا دے گی۔سپریم کورٹ نے اسی کمی کو اجاگر کیا۔انہوں نے کہاکہ ہرشکشامترسے حکومت اپیل کرتی ہے کہ وہ تحمل اور صبر بنائیں اور حکومت ان کی باتوں کو سن کر مناسب کارروائی کرے ان کے مفادات کومحفوظ کرنے کی کوشش کرے گی۔