یوگی کی یوپی میں لاء اینڈآرڈربدحال؟ خاتون کو اغواکرکے اجتماعی عصمت دری ، مجرمین تاہنوز آزاد
مظفر نگر، 18؍ نومبر (ایس او نیوز؍ آئی این ایس انڈیا )لاء اینڈآرڈرپرسماجوادی حکومت کوہردم گھیرنے اورعوام سے مضبوط نظام کاوعدہ کرکے اقتدارمیں آئی یوگی حکومت میں ریاست بھرسے جرائم کی خبریں مسلسل آرہی ہیں۔ریاست میں جہاں ایک طرف بی جے پی امن و قانون کی بالادستی اور خواتین کے تحفظات کا گیت گار ہی وہیں آئے دن ریاست کو عصمت دری کے واقعات نے ہلا کر رکھ دیا ہے ، عوام کو یاد ہوگا کہ بی جے پی نے سبز باغ دکھانے میں کوئی کسر نہیں چھوڑی تھی ؛ لیکن وہیں اب ملک میں ریکارڈ توڑ جنسی درندگی کے واقعات اسی ریاست میں پیش آ رہے ہیں جو حکمراں طبقہ کی نااہلی کی بین دلیل ہے ، ریاست کی یہ بدترین حالت ہوچکی ہے کہ ’’بیٹی بچاؤ ‘‘ نعرہ اب اپنے برعکس مفہوم کی ترجمانی کر رہا ہے ۔ ملی مصدقہ اطلاعات کے مطابق مظفرنگر میں ایک 26 سالہ خاتون گیتا( فرضی نام ) کے ساتھ رام لیلا ٹیلا علاقے میں تین افراد نے مل کر جنسی درندگی کی اور پھر اس مظلوم عورت کو چھوڑ کر فرار ہوگئے ۔ پولیس نے بتایا کہ متاثرہ کے شوہر کے درج کردہ شکایت کے مطابق یہ واقعہ شام میں پیش آیا ۔ ڈو یزنل افسر گریش بھدوریا نے کہا کہ تین ملز موں میں سے ایک شخص کی بیوی بھی اس واقعہ میں ملوث ہے ۔ انہوں نے کہا کہ معاملہ درج کرکے تفتیش کی جا رہی ہے ۔ واضح ہو کہ وہ وہی ریاست ہے جہاں عصمت دری کے واقعات میں دھماکہ خیز اضافہ ہورہا ہے ؛ لیکن اس سمت میں یوگی سرکار محوِ خواب ہے ۔