بنگلورو،20؍جنوری(ایس او نیوز) وزیر اعلیٰ سدرامیا نے کہا ہے کہ وہ کوئی توہم پرست یا بدعقیدہ شخص نہیں ہیں کہ ان کے کپڑوں پر کوے کے بیٹ کردینے سے اسے نحوست تصور کریں۔ آج شیموگہ میں اخباری نمائندوں سے بات چیت کرتے ہوئے سدرامیا نے کہاکہ کیرلا کے منجیشور میں کل ایک پروگرام کے دوران ان کے کرتے پر کوے نے بیٹ کردی تو اسی کو خبروں میں اچھالا جارہاہے۔وہ اس بات کو بدشگونی ہرگز تصور نہیں کرتے۔ درخت کے نیچے اگر بیٹھے ہوں اور وہاں کوا، الو یا کوئی اور پرندہ اگر بیٹ کردے تو اسے کیا کرسکتے ہیں۔غیر ضروری طور پر میڈیا بھی اس طرح کے معاملات کو طول دینے کی کوشش نہ کرے۔ انہوں نے کہاکہ بے زبان پرندے اگر ایسا کردیں تو کوئی کیا کرسکتا ہے۔

ترقیاتی کام ہی حکومت کیلئے ضامن:اس موقع پر وزیراعلیٰ نے کہاکہ ریاست میں پچھلے چار سال کے دوران کانگریس حکومت نے جو ترقیاتی کام انجام دئے ہیں وہی آئندہ انتخابات میں کانگریس پارٹی کیلئے جیت کا ذریعہ بنیں گے۔ آج شیموگہ میں مختلف ترقیاتی کاموں کے افتتاح کیلئے آمد کے بعد وزیراعلیٰ نے کہاکہ ریاستی حکومت نے کئی عوام پر ور پروگرام شروع کئے ہیں اور ان عوام پرور پروگراموں کو ریاست گیر مقبولیت حاصل ہوئی ہے۔ انہوں نے کہاکہ عوام نے ان پروگراموں کا بھرپور ساتھ بھی دیا ہے۔حال ہی میں ریاست کے مختلف مقامات پر عورتوں کی جنسی ہراسانی اور زیادتی کے واقعات کی سخت مذمت کرتے ہوئے سدرامیا نے کہاکہ خاطی جو بھی ہو اس کے مقام اور مرتبے کی پرواہ کئے بغیر سخت کارروائی کی جائے گی۔ وزیر اعلیٰ نے کہاکہ سرکاری ملازمین کو ساتویں پے کمیشن کے مطابق تنخواہ دینے کے سلسلے میں عنقریب متعلقہ کمیٹی کی میٹنگ ہوگی اور ایک لائحہ عمل وضع کیا جائے گا۔