ملک بھر میں لاری مالکان کی ہڑتال شروع اشیائے ضروری کی سربراہی متاثر ہونے کا امکان
بنگلورو 18؍ جون(ایس او نیوز) ڈیزل کی قیمتوں میں اضافہ، تھرڈ پارٹی انشورنس پریمیم کی فیس میں اضافے کے خلاف کرناٹک سمیت ملک بھر میں لاری مالکان کی غیر معینہ مدت ہڑتال آج سے شروع ہوچکی ہے۔ اس ہڑتال میں کل سے مزید شدت لائی جائے گی۔لاری ہڑتا ل کی وجہ سے بیرونی علاقوں سے شہر آنے والی لاریوں کی تعداد 90فیصد کم ہو چکی ہے۔ شہر آنے والی لاریاں بھی کل سے اس ہڑتال میں شامل ہوں گی جس کی وجہ سے ہڑتال میں شدت پیدا ہوگی۔چاول ، گیہوں، ترکاری سمیت دیگر روز مرہ استعمال کی جانے والی اشیاء کی سربراہی پوری طرح متاثر ہونے کا امکان ہے۔ شہر میں تین لاکھ لاریوں سمیت ریاست کے 9.30لاکھ اور ملک بھر میں 93 لاکھ لاری مالکان نے اپنی مانگوں کو پورا کرنے کا مطالبہ کرتے ہوئے غیر معینہ مدت ہڑتال شروع کی ہے۔ وائٹ فیلڈ میں موجود کنٹینر گوڈس شیڈ میں مکمل طور پر لاریاں رکی پڑی ہوئی ہیں۔یہاں ایک ہزار سے زائد لاریاں سڑکوں پر گئے بغیر رکی ہوئی ہیں۔ اس کے علاوہ یشونت پور دیوراج ارس ٹرمنل ، اے پی ایم سی سمیت ریاستی اور قومی شاہراہوں کے کنارے لاریاں رکی پڑی ہیں۔ تھرڈ پارٹی انشورنس پریمیم کی فیس 27ہزار روپیوں سے بڑھا کر 48ہزار کردی گئی ہے۔ اس کے علاوہ ڈیزل کی قیمتوں میں ہر دن اضافے سے لاری مالکان پر افزود بوجھ پڑا ہے جس سے مالکان کافی پریشان ہیں۔اس کومنسوخ کرنے کی مانگ کو لے کر آل انڈیا لاری اونرس فیڈریشن نے غیر معینہ مدت ہڑتال کا اعلان کیا تھا۔ اس کے لئے دیگر لاری مالکان کی تنظیموں نے بھی ہڑتال کی تائید کی ہے۔ ریاست میں آل کرناٹک لاری اونرس فیڈریشن کے ریاستی صدر بی چنا ریڈی کی قیادت میں ہڑتال شروع کی گئی ہے۔ فیڈریشن کے جنرل سکریٹری گوپال سوامی نے بتایا کہ مرکزی حکومت بار بار ڈیزل اور پٹرول کی قیمتوں میں اضافہ کرتی جا رہی ہے۔ جس کی وجہ سے لاری مالکان اور اس سے جڑے افراد پر بوجھ پڑنے لگا ہے۔ انہوں نے بتایا کہ ڈیزل کی قیمتوں میں کمی کرنے اور تھرڈ پارٹی انشورنس پریمیم کی فیس میں کمی کرنے کی مانگ کو لے کر کئی مرتبہ فیڈریشن کے عہدیدار وزیر اعظم نریندر مودی کو یاد داشت پیش کر چکے ہیں۔ لیکن افسوس کے ابھی تک اس سلسلہ میں کوئی اقدام نہیں ہوپایا ہے۔ انہوں نے بتایا کہ لاری مالکان کے ساتھ سوتیلے پن کی وجہ سے ملک گیر لاری ہڑتال کرنے کا فیصلہ کیا گیا تھا۔ انہوں نے بتایا کہ آج سے شروع ہوئی ہڑتال میں ملک بھر کی 93 لاکھ سے زائد لاریاں حصہ لے رہی ہیں اور اپنی مانگوں کو پورا کرنے کا پر زور مطالبہ کر رہے ہیں۔ انہوں نے بتایا کہ تھرڈ پارٹی انشورنس پریمیم کی فیس 1117 فیصد بڑھائی گئی ہے۔مرکزی حکومت اس میں فوری کمی کرتے ہوئے لاری مالکان کوراحت پہنچائے۔