ٹریفک پولیس کے کپڑوں میں کیمرے نصب: پرمیشور
بنگلورو:29/اپریل(ایس او نیوز) وزیر داخلہ ڈاکٹر جی پرمیشور نے بتایاکہ ٹریفک پولیس کو جدید ٹیکنالوجی سے آراستہ کرتے ہوئے ٹریفک پولیس اہل کار کے شرٹ میں کیمرے نصب کئے گئے ہیں۔ کے آر پورم میں ٹریفک پولیس تھانہ کیلئے سنگ بنیاد رکھنے کے بعد انہوں نے بتایاکہ اگر عوام کے ساتھ جھڑپ ہو یا پولیس اہلکار پر حملہ ہو تو ایسے واقعات پر قابو پانے کیلئے پولیس اہلکاروں کے شرٹ کے بٹن میں کیمرے نصب کئے جارہے ہیں۔ جس میں سارا منظر ریکارڈ ہوگا۔ شہر میں موجود ٹریفک مینجمنٹ سنٹر میں ٹریفک قوانین کی پامالی کا جائزہ لیا جائے گا، جس کیلئے درکار ایچ ڈی کیمرے شہر بھر میں نصب کئے جارہے ہیں۔ انہوں نے عوام سے درخواست کی کہ وہ ٹریفک قوانین پر عمل کرتے ہوئے حادثات پر روک لگائیں۔ ان کے مطابق خواتین کے تحفظ کیلئے موبائل ایپ جاری کیا گیا ہے۔ شہر میں محکمہئ پولیس کیلئے تین سو گاڑیاں فراہم کی گئی ہیں، جن میں ٹیاب لیٹ بھی مہیا کئے گئے ہیں۔ خواتین کے تحفظ سے متعلق موجود ایپ میں اگر کوئی شکایت موصول ہوتو صرف پندرہ سکینڈ میں کنٹرول روم کے ذریعہ پیغام روانہ کیا جائے گا اور فوری طور پر پولیس اس خاتون کی حفاظت کیلئے پہنچ جائے گی۔ ڈاکٹر پرمیشور نے بتایاکہ محکمہئ پولیس کو عوام سے قریب لانے کے مقصد سے اس طرح کے پروگرام جاری کئے گئے ہیں۔ جس کیلئے ہر علاقہ میں ایک پولیس اہلکار کو ذمہ داری سونپی گئی ہے جو اپنے علاقہ کے پچاس لوگوں سے مسلسل رابطہ میں رہے گا اور وہاں پیش آنے والے حالات کی نگرانی کرے گا۔ پورے ملک میں اس طرح کا نظام پہلی مرتبہ شہر بنگلور میں جاری کیا گیا ہے۔ وزیر داخلہ نے بتایاکہ عوام کے مفادات کے ساتھ پولیس اہلکاروں کے مفادات کا تحفظ بھی حکومت کی ذمہ داری ہے۔ اعداد وشمار کا حوالہ دیتے ہوئے انہوں نے بتایاکہ شہر بنگلور کی آبادی 1.2کروڑ ہے، جن میں سے 68لاکھ گاڑیاں روزانہ دوڑتی ہیں، جس کے سبب ٹریفک اژدہام رونما ہوتا ہے، ایسے میں مزید بسوں اور ٹرینوں کی سہولت کے ساتھ پبلک ٹرانسپورٹ نظام کو مقبول بنانے کی کوشش کی جائے گی۔ رکن اسمبلی بائرتی بسوراج کے علاوہ پولیس کمشنر پروین سود اور دیگر موجود تھے۔