جواں سال کارپوریٹر ایلو ملائی فوت
بنگلورو۔6؍دسمبر(سیاست نیوز) شہر کے سگایا پورم وارڈ کے جواں سال کارپوریٹر ایلو ملائی جو ناک کے ایک معمولی آپریشن کے لئے سنتوش اسپتال میں داخل ہوئے تھے ، آپریشن کے دوران زبردست دل کا دورہ پڑنے کے سبب کوما میں جانے کے بعد آج چل بسے ۔ بتایاجاتا ہے کہ ناک میں معمولی تکلیف کے سبب ایلو ملائی نے سنتوش اسپتال میں داخل ہوئے تھے ، گزشتہ ماہ اسپتال میں معمولی سرجری کے دوران ایلو ملائی پر زبردست دل کا دورہ پڑا اس سے وہ کوما میں چلے گئے۔ علاج کے لئے انہیں وکرم اسپتال منتقل کیا گیا تھاجہاں کل رات دیڑھ بجے ایلو ملائی نے دم توڑ دیا۔ پچھلے بی بی ایم پی انتخابات میں کانگریس سے ٹکٹ نہ ملنے پر آزاد امیدوار کے طور پر میدان میں اتر کر ایلو ملائی نے سگایا پورم میں کامیابی حاصل کی تھی، اور بی بی ایم پی میں کانگریس جے ڈی ایس اتحاد میں وہ اسٹانڈنگ کمیٹی کے چیرمین کے طور پربھی کام کرچکے ہیں۔ بتایاجاتاہے کہ سنتوش اسپتال میں آپریشن کے دوران نہ صرف ایلو ملائی پر دل کا دورہ پڑا بلکہ ان کے تمام اعضا بھی ناکارہ ہوگئے۔ ایلوملائی کے کومامیں جانے کے بعد یہ شکایت سامنے آئی کہ سنتوش اسپتال کے ڈاکٹروں کی مبینہ لاپروائی ایلو ملائی کی اس حالت کے لئے ذمہ دار ہے۔بی بی ایم پی میٹنگ میں بھی معاملہ اٹھایا گیا اور میئر گنگامبیکے نے سنتوش اسپتال کے خلاف جانچ کے احکامات صادر کئے۔ ایلو ملائی کی موت کے سبب آج بی بی ایم پی کے تمام دفاتر کو چھٹی کا اعلان کیا گیا۔ان کی موت پر متعدد قائدین نے اپنے صدمے کا اظہار کیا ہے۔ سینئر کانگریس لیڈر ورکن اسمبلی جناب روشن بیگ نے لنگراج پورم کے چارلس میدان پہنچ کر ایلو ملائی کی جسد خاکی کا دیدار کیا اوران کے افراد خانہ کو تسلی دی۔ ایلو ملائی کا شمار جناب روشن بیگ کے کٹر حامیوں میں کیا جاتا ہے۔ ان کی موت پر میئر گنگامبیکے ، ڈپٹی میئر بھدرے گوڈا ، حکمران پارٹی کے لیڈر ایم شیوراج ، اپوزیشن لیڈر پدمانابھا ریڈی، جے ڈی ایس گروپ لیڈر نیترا نارائن اور دیگر نے تعزیت ادا کی۔