بنگلورو۔18؍اپریل(ایس او  نیوز) کے پی سی سی صدارت پر برقرار رکھنے کانگریس اعلیٰ کمان کی طرف سے کئے گئے فیصلے پر مسرور وزیر داخلہ ڈاکٹر جی پرمیشور نے کہاکہ ریاستی اسمبلی انتخابات کے دوران کانگریس کی قیادت کون کرے گا اس سلسلے میں فیصلہ پارٹی اعلیٰ کمان کی طرف سے ہوگا نہ کہ مقامی سطح پر ۔ انہیں کے پی سی سی صدارت سے ہٹانے کے متعلق وزیر اعلیٰ سدرامیا کے گروپ کی طرف سے کی گئی کوششوں پر اپنی ناراضگی کا دبے الفاظ میں اظہار کرتے ہوئے ڈاکٹر پرمیشور نے کہاکہ اسمبلی چناؤ میں کانگریس کی قیادت کس کے ہاتھ میں ہوگی یہ فیصلہ بنگلور میں نہیں دہلی میں کیا جائے گا۔ انہوں نے کہاکہ حالانکہ وزیراعلیٰ سدرامیا نے کہاہے کہ اگلے انتخابات بھی انہی کی قیادت میں لڑے جائیں گے، لیکن اس سلسلے میں قطعی فیصلہ کانگریس پارٹی کی مرکزی قیادت ہی ہمیشہ سے کرتی آئی ہے۔ لیکن ان کا اور سدرامیا کا مقصد ایک ہی ہے کہ کسی طرح کانگریس ریاست کے اقتدار پر برقرار رہے۔اس مقصد کیلئے تمام مل کر ریاست میں پارٹی کو مضبوط کرنے کیلئے کام کریں گے۔ ڈاکٹر پرمیشور نے اگلے انتخابات میں جنتادل (ایس) سے مفاہمت کی خبروں کو مسترد کرتے ہوئے کہاکہ پارٹی میں کسی بھی سطح پر اس موضوع پر بات چیت ہوئی ہے اور نہ ہی ایسی کوئی تجویز کانگریس قیادت کے زیر غور ہے۔ انہوں نے کہاکہ ریاست کی سیکولر سیاسی جماعتوں کا یہی مشترکہ مقصد ہونا چاہئے کہ کسی بھی حالت میں فرقہ پرست بی جے پی اقتدار پر آنے نہ پائے۔ ریاستی کابینہ میں ردوبدل اور توسیع کے متعلق سوال پر انہوں نے کہاکہ یہ وزیر اعلیٰ سدرامیا کے اختیار میں ہے، وہی اس سلسلے میں قطعی فیصلہ کریں گے۔