غیر قانونی زمینات پر سرکاری قبضہ بحال،215کروڑ روپیوں کی زمین خالی کردی گئی
بنگلورو،3؍جون(ایس او نیوز) بنگلور ساؤتھ ، ایسٹ اور نارتھ تعلقہ جات میں بیک وقت کارروائی کرتے ہوئے شہر کے ضلع انتظامیہ نے 215کروڑ روپے مالیت کی 45.22 ایکڑ زمین پر قبضہ بحال کرلیاہے۔بنگلور ساؤتھ تعلقہ کے گلر ہلی سروے نمبر31اور 55 میں 40 ایکڑ سرکاری زمین پر بی ڈی اے اور دیگر چند بارسوخ شخصیتوں نے قبضہ کررکھا تھا ، آج صبح شہر کے ڈپٹی کمشنر وی شنکر کی ہدایت پر سب ڈویژنل آفیسر ڈی بی نتیش ، اڈیشنل ڈی سی کانت راجو، تحصیلدار شیوکمار، ایکسائز سب ڈویژنل آفیسر ناگراج ریڈی وغیرہ نے بی ڈی اے کی طرف سے قبضہ کی گئی زمین اور دیگر زمینات کو اپنے قبضے میں لے لیا، بی ڈی اے نے جس زمین کو قبضہ میں لیاتھا وہاں ایک لے آؤٹ ترتیب دیاجاچکا ہے۔اس کے علاوہ چند اہم شخصیتوں نے اس سرکاری زمین پر قبضہ کرکے وہاں مکانات اور عارضی شیڈ بنوالئے تھے، جبکہ کچھ لوگ راستے کے کنارے چھوٹی موٹی دکانیں لگا چکے تھے۔ غیر قانونی قبضہ کے متعلق اطلاع ملتے ہی مقامی لوگوں نے اپنے طور پر ہی اس زمین کو خالی کرنے کا سلسلہ شروع کردیا۔ بعد میں بنگلور ایسٹ تعلقہ کے سداپور دیہات کے وائٹ فیلڈ ورتور مین روڈ پر 22گنٹے سرکاری زمین پر قبضہ بحال کرلیا گیا۔ یہاں پر ڈی مارٹ شیل پٹرول بنک اور دیگر بڑی عمارتیں موجود تھیں۔ اس کے علاوہ کچھ چھوٹی موٹی دکانیں ، ہوٹل ، گیاریج وغیرہ موجود تھے۔ اسی طرح بنگلور نارتھ تعلقہ کے ہوسہلی دیہات میں سروے نومبر 21کے تحت غیر قانونی قبضہ کی جاچکی پندرہ کروڑ روپے مالیت کی زمین پر ضلعی انتظامیہ نے اپنا قبضہ بحال کرلیا۔