نئی دہلی:8/ اگست (ایس او نیوز/آئی این ایس انڈیا)حکومت ہندکے محکمہ محصول کے ڈائریکٹوریٹ آف ریوینیو انٹیلی جنس (ڈی آر آئی)کے دہلی زونل یونٹ کے افسروں کی خصوصی اطلاع پر کارروائی کرتے ہوئے، نئی دہلی کے اندرا گاندھی ہوائی اڈے کے ڈپارچر ہال ٹی-3 سے7 غیر ملکی باشندوں کو گرفتار کر کے ان کے قبضے سے بڑی تعداد میں غیر ملکی کرنسی برآمدکی ہے۔یہ غیرملکی باشندے5اور6اگست2018کی شب کے درمیان کے ہانگ کانگ کے لئے جہاز پر سوار ہونے جا رہے تھے، جب انہیں روکاگیااوران کے بیگوں سے یہ غیر ملکی کرنسی برآمد کی گئی۔ اس اسمگلنگ گروہ میں ملوث ہندوستانی باشندوں کا بھی پتہ لگایا گیا ہے اور انہیں بھی گرفتار کر لیا گیا ہے۔ایئرورٹ ایجنسیوں کے حوالیسے پتہ لگا ہے کہ اس غیر ملکی رقم کو تولیوں میں سختی سے لپیٹا گیا تھا تاکہ بھاگنے میں آسانی ہو۔ تمام کرنسی 100 ڈالر کے نوٹوں پر مشتمل تھی ۔ کل تقریباً 8.90لاکھ کے ڈالر برآمد ہوئے ہیں، جن کی بازار میں مالیت آئی این آر 6.14 کروڑ روپے ہے۔ تفتیش سے اب تک پتہ چلا ہے کہ اس اسمگلنگ گروہ میں شامل ہندوستانی اور غیر ملکی افراد ہانگ کانگ اور ہندوستان کے قریب رہائش پذیر تھے۔ اس گروہ کا سرغنہ اور ماسٹر مائنڈ ہانگ کانگ میں رہتا ہے، جو مختلف اشخاص کے ذریعہ سونے کے بار چھپا کر ہندوستان بھیجتا ہے۔ ہندوستان میں اس گروہ کا ایک شخص اس سونے کو حاصل کر کے بدلے میں ہندوستان سے غیر ملکی کرنسی واپس ہانگ کانگ بھیجتا تھا۔ تفتیش سے یہ بھی انکشاف ہوا ہے کہ ہندوستان میں کسٹمز کی نظروں سے بچنے کیلئے سونا لانے اور کرنسی لے جانے والے لوگوں کو کبھی بھی دوبارہ استعمال نہیں کیا جاتا تھا۔ بھارت میں ماضی میں بھی، ڈی آر آئی نے متعدد غیر ملکی باشندوں کو پکڑا ہے، جو سونا، غیر ملکی کرنسی اور ہتھیار جیسے سامان کی اسمگلنگ میں ملوث تھے۔تمام آٹھ افراد کو گرفتار کر لیا گیا ہے۔ اس معاملے میں مزید پوچھ تاچھ جاری ہے۔