25مارچ کو بی بی ایم پی بجٹ،غرباء کی فلاح پر توجہ: گنا شیکھر
بنگلور:16/مارچ(ایس او نیوز)25 مارچ کی صبح برہت بنگلور مہانگر پالیکے کا بجٹ پیش کیا جائے گا، جس میں ہمہ جہت ترقی اور غریبوں کی فلاح وبہبود پر خصوصی توجہ دی جائے گی۔ یہ بات آج بی بی ایم پی کی ٹیکس اینڈ فائنانس کمیٹی چیرمین ایم کے گنا شیکھر نے کہی۔ اخباری نمائندوں سے بات چیت کرتے ہوئے انہوں نے کہاکہ اس بار بی بی ایم پی کے بجٹ میں اب تک شروع کئے گئے مختلف پراجکٹوں کا احاطہ بھی کیا جائے گا۔ وزیر اعلیٰ سدرامیا نے ریاستی بجٹ میں بی بی ایم پی کو 8/ ہزار کروڑ روپیوں کی رقم مہیا کرائی ہے۔ انہوں نے کہاکہ توقع سے زیادہ گرانٹس بی بی ایم پی کو اس بجٹ میں دئے گئے ہیں، اسی لئے بی بی ایم پی کے بجٹ میں بھی نئے نئے منصوبوں کی شمولیت یقینی بنائی جائے گی۔ انہوں نے کہاکہ شہر بھر کے بوسیدہ اور غیر مستعمل بی بی ایم پی مارکیٹوں کو منہدم کرکے انہیں پارکنگ کامپلکسوں میں تعمیر کرنے کا منصوبہ بجٹ کا حصہ ہوگا۔ انہوں نے کہاکہ پہلی بار ان کی کمیٹی نے شہر کے تمام گھروں کو ڈجیٹل نمبر الاٹ کرنے کا فیصلہ کیا ہے۔اس سے گھروں کی نشاندہی میں آسانی ہوگی۔انہوں نے کہاکہ یہ کھاتہ رکھنے والے جائیدادوں کو ان نمبروں کی فراہمی سے گھروں کی تعمیر کیلئے قرضہ جات حاصل کرنے میں آسانی ہوگی۔ گنا شیکھر نے بتایاکہ 2016-17 کے دوران اب تک بی بی ایم پی نے 2967 کروڑ روپیوں کی آمدنی حاصل کی ہے، گزشتہ سال آمدنی 2267 کروڑ روپے رہی۔ ریاستی حکومت کی طرف سے بی بی ایم پی کے تمام 198 وارڈوں میں نما کینٹین شروع کرنے کے اعلان پر گنا شیکھر نے کہاکہ وزیر اعلیٰ سدرامیا نے ان کیٹینوں کیلئے بجٹ میں 100کروڑ روپے مختص کئے ہیں، آنے والے دنوں میں تمام وارڈ آفسوں یا سب ڈویژن آفسوں میں ان کیٹینوں کی شروعات کی جائے گی، جس سے غریب اور متوسط طبقے کو فائدہ ہوگا۔ بتایا جاتا ہے کہ ریاستی حکومت اسکان کے اشتراک سے یہ نما کینٹین اسکیم لاگو کرنا چاہتی ہے۔اکشے پاترا فاؤنڈیشن اس اسکیم کی پوری نگرانی اپنے ذمہ لے گا، جہاں صبح کا ناشتہ پانچ روپے میں اور دوپہر کاکھانا دس روپیوں میں مہیا کرائے گا۔اکشے پاترا فاؤنڈیشن نے ایک وقت کے کھانے کی قیمت 60 روپے طے کی ہے، جس میں سے 35 روپے حکومت برداشت کرے گی۔ محکمہئ شہری رسد وخوراک اس اسکیم کی راست طور پر نگرانی کرے گا اور بی بی ایم پی اس میں تعاون کرے گی۔ کھانے کے معیار کی مسلسل نگرانی یقینی بنانے کیلئے محکمہئ شہری رسد نے اکشے پاترا فاؤندیشن کے ساتھ ایک دور کی بات چیت مکمل کرلی ہے، دو ماہ کے اندر شہر بھر میں اس طرح کے کینٹینوں کی شروعات تیزی سے کردی جائے گی۔