بنگلورو:18/ اگست(ایس او نیوز) رکن کونسل وریاستی محکمۂ بہبود خواتین واطفال کی لیجسلیچر کمیٹی کے چیرمین وی ایس اگرپا نے کہا کہ اسکولوں میں عوام کے داخلے پر پابندی لگنی چاہئے۔ اسکول کے پرنسپل کی اجازت کے بغیر اسکول کے احاطہ میں والدین کے داخلے کو بھی ممنوع قرار دینے کی سفارش پر ان کی کمیٹی سنجیدگی سے غور کررہی ہے۔ ماگڑی تعلقہ کی سرکاری پرائمری اسکول کی ایک معلمہ پر پٹرول پھینک کر آگ لگانے کے واقعہ کے بعد آج یہاں پہنچ کر معائنہ کرنے کے بعد اخباری نمائندوں سے بات چیت کرتے ہوئے اگرپا نے کہاکہ شامبیا پالیہ کی سرکاری پرائمری اسکول کی ٹیچر سنندا کو کام کرنے سے روکنے اور اسکول میں گھس کر اس پر پٹرول بم پھینکنے کا واقعہ قابل مذمت ہے۔ یہ معلمہ اسپتال میں زندگی اور موت کی جنگ لڑ رہی ہے۔انہوں نے کہاکہ محکمۂ تعلیمات کو یہ سخت وارننگ دی جائے گی کہ دوبارہ اس طرح کے واقعات رونما نہ ہوں ،اس کیلئے ضروری قدم اٹھائے جائیں۔ انہوں نے کہاکہ اس واقعہ کو دیکھتے ہوئے کمیٹی یہ سنجیدگی سے غور کررہی ہے کہ کسی بھی اسکول میں عوام خاص طور پر بچوں کے والدین کو داخل ہونے سے روکنے اور ان پر ضروری پابندیاں لاگو کرنے کے سلسلے میں حکومت سے سفارش کرے۔ انہوں نے کہاکہ ماگڑی کے اسکول میں حملہ کا شکار معلمہ کو فوری طور پر دو لاکھ روپے کا معاوضہ ادا کرنے اور اس کے علاج کا مکمل خرچ حکومت کی طرف سے ادا کرنے کیلئے بھی کمیٹی نے محکمۂ تعلیمات کو ہدایت جاری کی ہے۔ انہوں نے کہاکہ ریاستی حکومت سے منظوری کے بغیر نجی اقامتی اسکولوں کے قیام پر روک لگانے اور اساتذہ وطلبا کے مفاد میں ان اسکولوں کو جو پہلے ہی قائم ہوچکے ہیں باضابطہ منظوری دینے کیلئے بھی ضروری قدم اٹھانے کی کمیٹی نے سفارش کا فیصلہ کیا ہے۔