تلنگانہ کے وزیراعلیٰ کے چندر شیکھر راؤ کی ایچ ڈی دیوے گوڈا سے ملاقات
بنگلورو،13؍اپریل(ایس او نیوز) ملک میں تیسرے محاذ کی تشکیل کے لئے جاری پہل کو آگے بڑھانے کے لئے آج تلنگانہ کے وزیراعلیٰ کے چندر شیکھر راؤ نے شہر میں سابق وزیراعظم اور جنتادل (ایس) سربراہ ایچ ڈی دیوے گوڈا سے ملاقات کی، اس موقع پر ان کے ہمراہ معروف فلم اداکار پرکاش رائے بھی موجود تھے۔ چندر شیکھر راؤ نے اس موقعے پر ریاستی جنتادل (ایس) صدر ایچ ڈی کمار سوامی سے بھی ملاقات کی۔ کافی دیرتک ہوئی بات چیت کو لے کر سیاسی حلقوں میں قیاس آرائیوں کا سبب بنی ہوئی ہے۔ بتایاجاتاہے کہ آنے والے لوک سبھا انتخابات میں علاقائی سیاسی قوتوں کو مضبوط کرنے کی پہل کے طور پر ان دونوں رہنماؤں کی بات چیت کو اہمیت کا حامل سمجھا جارہاہے۔ معتبر ذرائع کے مطابق اس بات چیت کے دوران دیوے گوڈا نے فلم اداکار پرکاش رائے کو مشورہ دیا کہ وہ آنے والے انتخابات میں جنتادل (ایس) کی حمایت کا اعلان کریں۔تاہم اس سلسلے میں انہوں نے کوئی جواب نہیں دیا۔