تلوار جوڑے کے وکیلوں کو ہائی کورٹ کی کاپی ملی
نئی دہلی،14؍اکتوبر(ایس او نیوزآئی این ایس انڈیا)آروشی اور ہیمراج کے قتل کے معاملے میں، راجیش اور نوپور تلوار کو بری کرنے کے الہ آباد ہائی کورٹ کے حکم نامہ کی کاپی تلوار جوڑے کے وکلاء کو مل گئی ہے ۔ تلوار کے ایک وکیل نے بتایا کہ حکم نامہ کی کاپی غازی آباد میں خصوصی سی بی آئی عدالت کو پیر کے دن دستیاب کرائی جائے گی۔ اس کے بعد ڈاسنا جیل کے حکام کو جوڑے کو بری کرنے کے لئے مذکورہ کاپی مہیا کرائی جائے گی۔ آروشی کی رشتہ دار وندنا تلوار نے بتایا:ہمیں الہ آباد ہائی کورٹ کے حکم کی ایک مصدقہ کاپی ملی ہے، ایسا امکان ہے کہ راجیش اور نوپور تلوار پیر کو جیل سے رہا ہو جائیں گے۔ راجیش اور نوپور تلوار آروشی اور ہیمراج کے قتل کے معاملے میں مجرم ٹھہرائے جانے اور عمر قید کی سزا ملنے کے بعد غازی آباد کی ڈاسنا جیل میں نومبر 2013 سے بند ہیں. راجیش اور نوپور دونوں ہی دانتوں کے ڈاکٹر ہیں۔ دونوں نے عمر قید کے فیصلے کو الہ آباد ہائی کورٹ میں چیلنج کیا تھا۔ ایک ہفتہ پہلے ہائی کورٹ نے تلوار جوڑے کو اس ڈبل مرڈر کیس میں بری کر دیا تھا ۔