بنگلورو۔27؍اپریل(ایس او  نیوز) شہر کے پیالیس گراؤنڈ میں آج باغی بی جے پی لیڈر کے ایس ایشورپا کی طرف سے طلب کی گئی بی جے پی باغی لیڈروں کی میٹنگ یڈیورپا اور ایشورپا کے حامیوں کے درمیان مارپیٹ کا مرکز بن گئی۔ جس کی وجہ سے کچھ دیر کیلئے کشیدگی پھیل گئی۔آج ایشورپا کی طرف سے بی جے پی بچاؤ میٹنگ کا اہتمام کیاگیا ،جس میں کلیدی خطاب کرتے ہوئے رکن کونسل بھانو پرکاش نے یڈیورپا ، بی جے پی ، پسماندہ طبقات مورچہ کے صدر پٹ سوامی اور ان کے حامیوں پر رکیک حملے کئے اور کہاکہ کچھ لوگ اعلیٰ عہدوں پر پہنچ کر بھی اپنی ادنیٰ ذہنیت برقرار رکھے ہوئے ہیں۔ انہوں نے کہاکہ ایسے لوگوں کو ہٹاکر پارٹی کو مضبوط کرنے کی ضرورت ہے۔ اپنی اس بات کے دوران بھانو پرکاش نے یڈیورپا پر بھی حملہ کردیا اور کہاکہ سنگولی راینا برگیڈ رہی تو یڈیورپا کو کیا تکلیف ہے۔ اس مرحلے میں یڈیورپا کے حامی شیوانی نے بھانو پرکاش پر رکیک حملہ کرتے ہوئے انہیں نااہل قرار دیا۔ جس کی وجہ سے جلسہ میں افراتفری مچ گئی۔اس مرحلے میں ایشورپا نے بھانو پرکاش کو یڈیورپا کے خلاف کچھ نہ بولنے کی تاکید کی اور کہاکہ یڈیورپا اگر چاہتے تو سنگولی راینا برگیڈ کا استعمال بی جے پی کو مضبوط کرنے کیلئے کرسکتے تھے، لیکن ایسا کرنے کی بجائے پارٹی کے ریاستی عہدیداروں کے تقرر میں بھی اپنی من مانی کررہے ہیں۔ اس بیان بازی کے درمیان ہی جلسہ گاہ میں موجود یڈیورپا اور ایشورپاکے حامیوں کے درمیان مارپیٹ کی نوبت آگئی اور کچھ کارکنوں کو جلسہ گاہ سے زبردستی باہر نکالنا پڑا۔