اقلیتوں کی فلاح کے محاذ پر کرناٹک ملک میں سب سے آگے : ویرپا موئیلی
بنگلورو،23؍ اگست(ایس او نیوز)سابق وزیراعلیٰ اور سینئر کانگریس لیڈر ایم ویرپا موئیلی نے کہاکہ کرناٹک اقلیتوں کی ترقی اور تحفظ اوقاف کے معاملے میں ملک کی دیگر ریاستوں کے مقابل کافی آگے ہے۔ آج شہر کے امبیڈکر بھون میں محکمۂ اقلیتی بہبود اور ریاستی وقف بورڈ کی طرف سے منعقدہ بنگلوراربن ، بنگلور رورل اور چکبالاپور اضلاع کے متولیان کی کانفرنس سے خطاب کرتے ہوئے انہوں نے کہا کہ ریاستی حکومت نے سپریم کورٹ کے احکامات کے مطابق اوقاف کی حفاظت کیلئے ملک میں سب سے پہلے وقف ضوابط مرتب کئے ہیں۔ ان ضوابط کے ذریعہ نہ صرف اوقافی املاک کا تحفظ یقینی بنایا جائے گا، بلکہ ان املاک کو ترقی دینے کیلئے بھی ضروری قدم اٹھائے جائیں گے۔ ڈاکٹر موئیلی نے کہاکہ بحیثیت وزیر اعلیٰ انہوں نے ریاست میں اقلیتوں کو چار فیصد ریزرویشن دیاتھا ،جس سے بڑی تعداد میں اقلیتی طبقات سے وابستہ امیدوار استفادہ کررہے ہیں۔اوقافی امور کے متعلق بیداری لانے اس طرح کی متولیان کانفرنس کا اہتمام کو انہوں نے خوش آئند پہل قرار دیا۔ اس کانفرنس میں وزیر اعلیٰ سدرامیا کی غیر حاضری کے متعلق انہوں نے کہاکہ سدرامیا چونکہ دورۂ بلگام پر ہیں اسی لئے وہ اس کانفرنس میں آنہیں سکے۔ وزیر شہری رسد وخوراک یوٹی قادر نے اس موقع پر کہاکہ متولیان مسلم معاشرہ میں بیداری لانے اور ترقیاتی اسکیموں سے مقامی لوگوں کو فائدہ پہنچانے کیلئے جدوجہد کریں، اس کام میں ان کا رول انتہائی اہمیت کا حامل ہے، انہیں حکومت اور عوام کے درمیان رابطۂ کار کا کردار ادا کرنا چاہئے۔ انہوں نے کہاکہ خوش قسمتی کی بات یہ ہے کہ کرناٹک میں فرقہ پرست طاقتوں کو پنپنے کا موقع نہیں ملا ۔ فرقہ پرست اکثریت سے وابستہ ہوں یا اقلیت سے اس سے معاشرہ کو نقصان ہی ہوتاہے ۔ خاص طور پر اگر اقلیتی لوگ فرقہ پرستی پر اتر آئیں تو اس سے اقلیتوں کی ہی حق تلفی ہوگی۔ انہوں نے کہاکہ محکمۂ اقلیتی بہبود کی طرف سے مساجد کے ائمہ اور موذنین کو جو ہدیہ دیاجارہاہے وہ ناکافی محسوس ہوتا ہے، ان کی معاشی حالت بہتر بنانے کیلئے اس میں اضافہ پر سنجیدگی سے غور کرنا چاہئے ساتھ ہی ان لوگوں کا اس قدر مالی تعاون ضرور ہونا چاہئے کہ وہ اپنے منصبی فرائض کی انجام دہی کے ساتھ اپنی معاشی حالت کو سدھارنے ضمنی طور پر تجارت کو اختیار کرسکیں۔ تقریب سے خطاب کرنے والوں میں وزیر اقلیتی بہبود ، اوقاف ، بنیاد ی وثانوی تعلیمات تنویر سیٹھ ، کے ایم ڈی سی چیرمین ایم اے غفور ، کرناٹک کے نمائندہ برائے دہلی کلیم احمد ریاستی اقلیتی کمیشن چیرمین نصیر احمد ، رکن کونسل عبدالجبار، محکمۂ اقلیتی بہبود کے سکریٹری محمد محسن ،کانگریس لیڈر جی اے باوا ، بنگلور اربن ضلع وقف مشاورتی کمیٹی چیرمین سید شجاع الدین، بنگلور رورل وقف مشاورتی کمیٹی کے چیرمین ایس بی باشاہ ، چکبالاپور ضلع وقف مشاورتی کمیٹی کے چیرمین بی ایس رفیع اﷲ اور دیگر نے اپنے خیالات پیش کئے۔