اسٹیل برڈج کی مخالفت پر سدرامیا احتجاجیوں پر برہم
بنگلورو،24؍ جولائی(ایس او نیوز) شہر کے شیوانند سرکل میں ٹریفک کے اژدہام کو قابو میں کرنے کیلئے ریاستی حکومت کی طرف سے اسٹیل برڈج کی تعمیر کے منصوبے کی مخالفت پر وزیر اعلیٰ سدرامیا نے سخت برہمی ظاہر کی ہے اور کہا کہ محض غلط فہمیوں کی وجہ سے اس طرح کا احتجاج کرنا غلط ہے۔وزیر اعلیٰ نے وضاحت کی کہ اس فلائی اوور کی تعمیر کیلئے شیوانند سرکل یا آس پاس کے علاقوں میں کوئی درخت نہیں کاٹا جارہاہے۔ آج شہر کے کورمنگلا سے ایجی پورہ تک فلائی اوور کی تعمیر کیلئے سنگ بنیاد رکھتے ہوئے سدرامیا نے کہاکہ شہر کی ترقی کیلئے بعض مقامات پر درخت کاٹنا ناگزیر ہوا تو کاٹے جائیں گے، لیکن اس ایک درخت کی جگہ دس نئے پودے بھی لگادئے جائیں گے۔ لیکن شیوانند سرکل کے قریب جس فلائی اوور کی تعمیر کا منصوبہ ہے اس کیلئے درخت کاٹنے کی ضرورت اب تک محسوس نہیں کی گئی ہے۔ وزیر اعلیٰ نے کہاکہ ٹیکنالوجی آج اس قدر ترقی کرچکی ہے کہ ایک سالم درخت کو کسی اور مقام پر آسانی سے منتقل کیاجاسکتاہے اور شہر میں ایسے کئی درخت منتقل بھی کئے جاچکے ہیں۔ انہوں نے کہا کہ صرف درختوں کی کٹائی کے بہانے سے شہر کی ترقی کیلئے فلائی اوور یا انڈر برڈج کی تعمیر کو روکا نہیں جاسکتا۔ اس سے پہلے بسویشورا سرکل سے ہبال تک مجوزہ اسٹیل برڈج کی تعمیر کی بے جا مخالفت کرتے ہوئے اس پراجکٹ کو عدالتی جھمیلوں میں پھنساکراسے رکوادیا گیا۔ کچھ لوگوں اور اپوزیشن پارٹیوں کو صرف احتجاج کرنا آتا ہے، ترقی میں تعاون دینا نہیں آتا۔ اس موقع پر وزیر ٹرانسپورٹ رام لنگا ریڈی نے بتایاکہ کورمنگلا سے ایجی پورہ تک تعمیر ہونے والے 2.4کلومیٹر طویل چار لائن کا یہ مجوزہ فلائی اوور سگنل فری ہوگا۔ اس کی تعمیر کیلئے 204کروڑ روپیوں کی لاگت آئے گی۔ 18ماہ میں یہ پراجکٹ مکمل کرلیا جائے گا۔اس برڈج کے استعمال سے کورمنگلا سے ایجی پورہ جنکشن تک ٹریفک کے اژدہام میں سفر کرنے کے برعکس 30منٹ پہلے منزل تک پہنچا جاسکتا ہے۔ یہ مجوزہ فلائی اوور کورمنگلا کے سونی جنکشن ، ایجی پورہ مین روڈ ، انر رنگ روڈ جنکشن ، کیندریہ سدن جنکشن ، کورمنگلا آٹھواں مین روڈ، کورمنگلا پانچواں بلاک اور کورمنگلا بی ڈی اے کامپلکس کو جوڑے گا۔ اس موقع پر وزیر برائے ترقیات بنگلو رکے جے جارج ، میئر پدماوتی ، رکن اسمبلی این اے حارث ، رکن کونسل ایچ ایم ریونا، ڈپٹی میئر آنند اور دیگر موجود تھے۔