نوجوانوں کے مسائل کی یکسوئی کے لئے ریاستی یوتھ کمیشن کا قیام: رحیم خان
بنگلورو،18؍فروری(ایس او نیوز) ریاستی حکومت کی طرف سے نوجوانوں کی ترقی کے لئے منصوبہ سازی کے مقصد سے کمیشن برائے نوجوانان قائم کرنے پر غور کیاجارہاہے۔ یہ بات آج ریاستی وزیر برائے کھیل اورامور نوجونان رحیم خان نے کہی۔
آج شہر کے ٹاؤن ہال میں ریاستی یوتھ کمیشن کے قیام کے متعلق پروگرام میں حصہ لیتے ہوئے انہوں نے کہاکہ نوجوانان نسل کو بہتر صحت، معیاری تعلیم اور روزگار مہیا کرانے کے تئیں ریاستی حکومت پابند عہد ہے۔ اس مقصد کو پورا کرنے کے لئے ریاستی یوتھ کمیشن کے قیام پر سنجیدگی سے غور کیاجارہا ہے۔ ملک کی آبادی کا 50 فیصد حصہ نوجوانوں پر مشتمل ہے، ان کی ترقی ملک کی نصف ترقی کے مترادف ہے۔
انہوں نے بتایاکہ کیرلا میں پہلے ہی صوبائی یوتھ کمیشن کا قیام کیا جاچکا ہے۔ انہیں خطوط پر کرناٹک میں کمیشن کے قیام کے امکانات کا جائزہ لیا جائے گا۔ انہوں نے کہاکہ اس کمیشن کی ذمہ دار ی ہوگی کہ نوجوانوں کی ترقی کے لئے درکار سہولتوں کے متعلق وقتاً فوقتاً حکومت کی رہنمائی کرے اور معاشی طور پر ان نوجوانوں کو مستحکم کرنے کے لئے ایسے اقدامات تجویز کرے جس سے بے روزگاری کا خاتمہ ہو اور خود روزگاری کو بڑھاوا ملے اس کے ساتھ ہی نوجوانوں میں احساس عدم تحفظ کو مٹایا جاسکے۔ رحیم خان نے بتایاکہ اس کمیشن کے قیام کے متعلق اپنے محکمے کے افسروں کے ساتھ وہ تمام پہلوؤں کا جائزہ لیں گے اور ریاست میں کیرلا سے بہتر مقاصد پر مبنی کمیشن کے قیام کی جدوجہد کریں گے۔