نئی دہلی ،16؍ اکتوبر (ایس او نیوز؍آئی این ایس انڈیا) سی پی ایم کے جنرل سکریٹری سیتا رام یچوری نے پٹرول ڈیزل کی مسلسل بڑھتی ہوئی قیمتوں کے معاملے میں مودی حکومت پر حملہ بولتے ہوئے کہا ہے کہ مرکز میں یہ اب تک کی سب سے سخت اور بے رحم حکومت ہے۔یچوری نے منگل کو ٹویٹ کر کہا کہ پٹرول اور ڈیزل کی قیمتوں میں مسلسل اضافہ ہو رہا ہے۔پٹرول پمپوں پر ٹیکس دہندگان کے پیسوں سے لگے پوسٹروں میں مودی مسکراتے ہوئے دکھائی دے رہے ہیں۔انہوں نے حکومت کے اس رویہ کو غیر ذمہ دارانہ قرار دیتے ہوئے کہا کہ پٹرول ڈیزل پر اضافی ٹیکس میں کمی کے باوجود قیمتوں میں اضافے رک نہیں رہی ہے۔یچوری نے کہا کہ ہم اب تک کی سب سے زیادہ سخت اور بے رحم حکومت کو دیکھ رہے ہیں۔انہوں نے گزشتہ ستمبر مہینے کے دوران برآمدات میں کمی کا ذکر کرتے ہوئے اسے بھی اقتصادی محاذ پر مودی حکومت کی ناکامی بتایا۔انہوں نے کہا کہ گرواٹ جاری ہے، سوال اٹھنے پر ہمیں حقائق کو مسترد کرتے ہوئے ورغلانے والے جواب مل رہے ہیں۔اس کی وجہ سے ہندوستان کی معیشت میں ٹھہراؤآ گیا ہے۔