سدرامیا کانگریس کو لے ڈوبیں گے: بی جے پی لیڈرسدانند گوڈا کا خیال
بنگلورو،2؍جون(ایس او نیوز) مرکزی وزیر برائے اعداد ومنصوبہ بندی ڈی وی سدانند گوڈا نے کہاکہ ریاست میں کانگریس کو ختم کرنے کیلئے اپوزیشن کی ضرورت نہیں وزیراعلیٰ سدرامیا ہی کافی ہیں۔ آج شہر کے ملیشورم میدان میں مودی حکومت کی تین سالہ کارکردگی کو عوام تک پہنچانے کیلئے شروع کی گئی مودی فیسٹ کا افتتاح کرتے ہوئے انہوں نے کہاکہ سدرامیا جب کانگریس میں شامل ہوئے تو اسی وقت انہوں نے ٹھان لی ہوگی کہ کانگریس کو ختم کرکے رہیں گے اب وہ اپنے اس کام کو تیزی سے انجام دے رہے ہیں۔
انہوں نے کہاکہ جو کانگریس لیڈران یہ کہہ رہے تھے کہ ملک سے کانگریس کو ختم کرنا ممکن نہیں ہے، اب انہیں ملک کے نقشے پر دور بین رکھ کر دیکھنا پڑ رہا ہے کہ کانگریس کہاں ہے۔آنے والے دنوں میں کرناٹک سے بھی کانگریس کا صفایا کردیا جائے گا۔ انہوں نے کہاکہ اترپردیش میں تمام قوموں کی مدد سے بی جے پی نے غیر معمولی جیت حاصل کی ہے اس کے بعد کانگریس کو اب یہ بھی کہنے کا اخلاقی حق نہیں ہے کہ بی جے پی ایک فرقہ پرست جماعت ہے۔کونسل کے چیرمین ڈی ایچ شنکر مورتی کے خلاف تحریک عدم اعتماد لانے کی کوشش کو غلط قرار دیتے ہوئے انہوں نے کہاکہ اپنی من مانی کے مطابق کونسل چیرمین کو ہٹانے کی غلط روایت کانگریس شروع کررہی ہے۔