پابندی سے کام کریں یا گھر بیٹھ جائیں،سرکاری افسران کو وزیراعلیٰ سدرامیا کی وارننگ
بنگلورو،7؍نومبر(ایس او نیوز؍عبدالحلیم منصور) وزیر اعلیٰ سدرامیا نے آج ریاست کے سبھی ڈپٹی کمشنروں ، پنچایت چیف ایگزی کیٹیو افسران اور دیگر اعلیٰ افسران کے ساتھ پورا دن میٹنگ کا اہتمام کیا اور انہیں سخت تاکید کی کہ پوری پابندی کے ساتھ اپنی ذمہ داریوں کو نبھائیں یا پھر آرام سے گھر بیٹھے رہیں۔ آج ودھان سودھا کے کانفرنس ہال میں صبح سے شام تک افسران کے ساتھ ہوئی میٹنگ میں وزیراعلیٰ سدرامیا نے انہیں سخت ہدایات جاری کیں اور کہاکہ سرکاری کام کاج میں کسی بھی طرح کی لاپرواہی اور سستی برداشت نہیں کی جائے گی۔ انہوں نے کہاکہ یہ سال ریاست کا انتخابی سال ہے اپریل یا مئی میں انتخابات ہوں گے ، اس مرحلے میں ریاستی حکومت چاہتی ہے کہ اپنے تمام وعدوں کو پورا کرے اور عوام کو جن سہولیات کی فراہمی ہونی چاہئے وہ بروقت ہو۔ انہوں نے کہاکہ ترقی کی رفتار کو تیز کرنے کی ضرورت ہے۔ انہوں نے افسران سے کہا کہ سیاست دان جب عوام سے ووٹ مانگنے جائیں گے توعوام ترقی کے متعلق ان سے سوال کریں گے سرکاری افسران سے نہیں ۔اسی لئے افسران پوری جواب داری سے کام کریں۔ اگر کام نہیں کرسکے تو افسران کو ذمہ دار ٹھہرایا جائے گا۔ سرکاری زمینات پر غیر قانونی قبضوں کو ہٹانے پر شدت سے زور دیتے ہوئے سدرامیا نے کہاکہ ان زمینات پر سماج کے ضرورت مند طبقات کیلئے مکانات تعمیر کرکے مہیا کرانے کا منصوبہ ریاستی حکومت بنا چکی ہے،جتنی جلد ہوسکے غیر قانونی قبضوں کوخالی کرایا جائے، اس میں کوتاہی برتنے والوں کے خلاف تادیبی کارروائی کو سدرامیا نے یقینی قرار دیا۔ انہوں نے کہاکہ اضلاع میں انتظامیہ کے سربراہ ہونے کے ناطے ڈپٹی کمشنروں کو سماجی خدمت کی طرف بھی متوجہ ہونا چاہئے۔سرکاری کالجوں ، اسکولوں اور آنگن واڈی مراکز کے ساتھ ہاسٹلوں کی عمارتوں کی تعمیر پر متوجہ ہوں۔ اس کے ساتھ ہی ریاست کے بیشتر علاقوں میں قبرستانوں کی زمین کیلئے مطالبے ہوتے ہیں اس پر بھی توجہ دی جائے۔ انہوں نے کہا کہ بنگلور میں سرکاری زمین پر غیر قانونی قبضے ختم کرنے کیلئے یہاں کے ڈپٹی کمشنر نے قابل تعریف کارنامہ انجام دیا ہے، جس کیلئے وہ مبارکباد کے مستحق ہیں۔ وہ چاہتے ہیں کہ دیگر اضلاع کے ڈپٹی کمشنرس بھی اسی تندہی کے ساتھ کام کریں۔حکومت چاہتی ہے کہ غیر قانونی قبضوں میں جاچکی سرکاری زمینات پر قبضہ بحال کرنے کے بعد یہاں سالانہ ایک لاکھ مکانات کی تعمیر کرکے انہیں مستحقین میں تقسیم کیا جائے۔ وزیر اعلیٰ نے کہاکہ بنگلور کی مانند ریاست بھر میں اندرا کینٹین شروع کی جارہی ہیں۔ یکم جنوری سے 247 اندرا کینٹین ان مقامات پر شروع کئے جائیں گے۔ جہاں کی آبادی ایک لاکھ سے زائد ہو۔میٹنگ میں ریاست کے دیگر تمام امور پر بھی شام تک تفصیلی بحث ہوتی رہی ، وزیر اعلیٰ کے علاوہ وزیر شہری ترقیات وحج جناب روشن بیگ، وزیر مالگذاری کاگوڈتمپا ، وزیر تعمیرات عامہ ڈاکٹر ایچ سی مہادیوپا ، وزیر داخلہ رام لنگا ریڈی، وزیر قانون ٹی بی جئے چندرا، وزیر توانائی ڈی کے شیوکمار ، وزیر شہری رسد وخوراک یوٹی قادر ،وزیر زراعت کرشنا بائرے گوڈا نیز کابینہ کے تقریباً تمام وزراء ، چیف سکریٹری سبھاش کنٹیا ، تمام محکموں کے پرنسپل سکریٹریز ، سکریٹریز اور دیگر اعلیٰ افسران موجود تھے۔