لکھنؤ:6/نومبر(ایس او نیوز/آئی این ایس انڈیا)لوہیا کے ترجمان اور سماجوادی بودھک سبھا (دانشوران کونسل )کے قومی صدر دیپک مشرا نے کہا کہ بھارتیہ جنتا پارٹی ان کی پارٹی کی دشمن نمبر ایک ہے اور پی ایس پی کی براہ راست جنگ بی جے پی اور اس کی فرقہ وارانہ سوچ سے ہے۔ تمام مورچوں پر ناکام ہونے کے بعد بی جے پی پھر سماجی ہم آہنگی خراب کی سیاست کرنے لگی ہے۔ترجمان نے کہا کہ مرکزی وزیر اوما بھارتی کا بیان ملک کی ہم آہنگی پر مبنی ثقافت کے برعکس اور نائب وزیراعلیٰ دنیش شرماکا بیان مضحکہ خیز ہے۔ دونوں کے بیان بھرم پھیلا کر خود غرضانہ مفاد کی تکمیل کے لیے ہے ۔ہر سچا بھارتی چاہے وہ ہندو ہو یا مسلمان، رواداری اور ہم آہنگی میں یقین رکھتا ہے. وہ تمام مذاہب کے عقائد،عبادت گاہ اور دیوتاؤں کا یکساں احترام کرتا ہے۔دیپک مشرا نے کہا کہ مندر کے پاس مسجد یا مسجد کے پاس مندر بننے سے ہندو نہ کبھی بے قابو ہوا ہے او رنہ ہوگا ۔ اوما بھارتی ملک کے مسلمانوں کو براہ راست یا بالواسطہ طور پر دھمکانا بند کریں۔ انہوں نے کہا کہ اتر پردیش کے نائب وزیر اعلی کا بیان کہ کیا رام کی مورتی لنکا میں بنے گی؟ ان کی کم علمی اور منفی سوچ کی عکاسی کرتا ہے۔ لنکا میں تقریبا 30 لاکھ ہندو ہیں جو پوری آبادی کے 12.6 فیصد کے برابر ہیں۔ لنکا میں رام کی لاکھوں مورتیاں نصب ہیں اور اس کی پوجا کی جاتی ہے ۔ ایسا احمقانہ بیان دے کر انہوں نے بھارت اور لنکا کے درمیان بھرم پھیلانے کا قابل مذمت فعل انجام دیا ہے ۔ مشرا نے کہا کہ ایسے بچکانہ بیان سے بی جے پی لیڈروں کو بچنا چاہئے، اس سے عوام میں سیاستدانوں کی جگ ہنسائی ہوتی ہے ۔