وسندھرا حکومت کے آرڈیننس کے خلاف کانگریس کا مظاہر ہ ،ہم چارسال کے کرپشن کوچھپانے والے بل کولاگو نہیں ہونے دیں گے: سچن پائلٹ
جے پور،23؍اکتوبر (ایس او نیوز؍آئی این ایس انڈیا ) کانگریسی لیڈرسچن پائلٹ نے کہاہے کہ ان کی پارٹی پوری قوت سے وسندھرا راجے حکومت کے اس آرڈیننس کی مخالفت کرے گی۔ترمیمی بل میں رہنماؤں اورحکام کے خلاف شکایت کرنے سے پہلے ریاستی حکومت کی اجازت کو لازم قرار دیا گیا ہے ۔ انہوں نے کہا ہے کہ یہ ایک سیاہ قانون ہے جس کے ذریعہ چار سال کے کرپشن کو چھپانے کی کوشش کی جا رہی ہے۔ پائلٹ نے کہا کہ ایک طرف تو پی ایم مودی کہتے ہیں کہ نہ کھاؤں گا اور نہ کھانے دوں گا دوسری طرف ان کی ہی پارٹی کی وزیر اعلی نے کرپشن کے دروازے کھول دیئے ہیں۔ جو کھلا ہوا تضاد ہے ،ہم اس آرڈیننس کو نافذ نہیں ہونے دیں گے ۔ واضح ہو کہ اس آرڈیننس کو اسمبلی میں پیش کیا گیا ہے جس کے تحت سی آر پی سی میں ترمیم کے اس بل کے بعد حکومت کی منظوری کے بغیر رہنماؤں اور افسروں کے خلاف کوئی کیس درج نہیں کرایا جا سکے گا یہی نہیں جب تک ایف آئی آر نہیں ہوتی پریس میں اس کی رپورٹ بھی نہیں کی جا سکے گی۔ ایسے کسی معاملے میں کسی کا نام لینے پر دو سال کی سزا بھی ہو سکتی ہے۔ تاہم اس کی شدید مخالفت جاری ہے ۔ اپوزیشن جماعت بھی اسے لائے جانے کی شدید مخالفت کر رہی ہے ۔