حیدرآباد19جون (ایس او نیوز؍ آئی این ایس انڈیا )ایک دن پہلے خبر آئی تھی کہ حیدرآباد سینٹرل یونیورسٹی کے دلت طالب علم روہت ویمولا کی ماں نے الزام لگایا ہے کہ انڈین مسلم لیگ پارٹی نے وعدے کے مطابق ان کی مدد نہیں کی۔ لیکن اب روہت ویمولا کی ماں رادھکا ویمولا نے ان خبروں کی تردید کی ہے۔ واضح ہو کہ روہت ویمولا نے جنوری 2016 میں پھانسی لگا کر خود کشی کر لی تھی۔ اس کے بعد انڈین مسلم لیگ پارٹی نے ان کے خاندان کو مدد کے طور پر 20 لاکھ دینے کا وعدہ کیا تھا۔منگل کو روہت ویمولا کی ماں رادھیکا نے کہا کہ یہ ساری خبریں غلط اور پروپیگنڈہ کی کارفرمائی ہے ۔ انہوں نے کہا کہ کوئی چیک باؤنس نہیں ہوا، کچھ غلطیوں کی وجہ سے اس کو مسترد کر دیا گیا تھا۔ مجھے انڈین مسلم لیگ سے کوئی مسئلہ نہیں ہے۔ انہوں نے زمین خریدنے کے لئے 5 لاکھ روپے دیئے ہیں اور مجھے رمضان کے بعد 10 لاکھ روپے اور دینے کا وعدہ کیا ہے۔ میں جو بھی بی جے پی کے خلاف ہیں، ان کے لئے حتی المقدور تشہیر کروں گی۔ روہت کے بھائی نے اپنی ماں کا دفاع کیا ہے۔ انہوں نے فیس بک پر لکھا کہ میں یہ واضح کر دینا چاہتا ہوں کہ کسی نے میرا اکاؤنٹ ہیک کر لیا۔ میری ماں، رادھکا ویمولا کو بدنام کرنے کی کوشش کی جا رہی ہے۔ کہا جا رہا ہے کہ وہ انڈین مسلم لیگ پارٹی سے کچھ پیسے لے کر مودی کے خلاف بول رہی ہے۔ یہ سچ نہیں ہے؛بلکہ سراسر جھوٹ ہے ۔ انڈین مسلم لیگ پارٹی نے ہمیں گھر بنانے کے لئے مدد کرنے کا وعدہ کیا کیونکہ ہم غریب ہیں اور وہ اپنا وعدہ نبھا رہے ہیں۔ ایک دن پہلے خبر شائع ہوئی تھی کہ کیرالہ کی ریاستی سطح کی پارٹی انڈین مسلم لیگ نے روہت ویمولا کی ماں رادھکا ویمولا کو گھر کے لئے 20 لاکھ دینے کا وعدہ کیا تھا۔ لیکن روہت ویمولا کے گھر والوں کا کہنا تھا کہ اس سمت میں کوئی پیش رفت نہیں ہوئی ہے اور سیاسی فائدہ کے لئے ان کا استعمال کیا گیا۔ رادھکا ویمولا نے کہا کہ وہ مجھے کیرالہ لے گئے، جہاں ایک بڑے اجتماع میں مجھے شامل کیا گیا۔ اس اجتماع میں پارٹی نے یہ وعدہ کیا کہ وہ ہمیں گھر بنانے کے لئے 20 لاکھ روپے دے گی۔