ریاست کرناٹک میں شدیدبارش سے کئی مقامات پر سڑکوں کو نقصان ۔عام زندگی مفلوج
بنگلورو، 12اکتوبر (ایس او نیوز ) جنوب مغربی مانسون کرناٹک میں شدت اختیار کرگیا ہے اور شہر کے نشیبی علاقوں کے علاوہ ریاست کے دیگر مقامات پر مقیم افراد گذشتہ تین دنوں سے رات جاگ کر گزاررہے ہیں۔شہر کے علاقو ں ایم ایم ہلز اور نیلمنگلا میں سب سے زیادہ 12سنٹی میٹر بارش ریکارڈ ہوئی ،جبکہ گزشتہ شب اس علاقہ میں 11سنٹی میٹر بارش ہوئی اور بنگلورو ۔ کنکاپورہ شاہراہ پر ٹریفک کی نقل وحرکت شدید طور پر متاثر رہی۔
چامراج نگر میسورو اضلاع میں گذشتہ دو شب سے شدید بارش کے سبب معمول کی زندگی مفلوج ہوگئی۔ چامراج نگر ضلع میں چکن ہولہ ڈیم 8برس کے وقفہ کے بعد لبریز ہوگیا۔ حدوتور کنال ہلہ میں ایک شخص کو دیہاتیوں نے اس وقت بچالیا جب وہ بارش کے پانی میں بہہ رہا تھا۔کولیگل ۔ ستیم منگلا شاہراہ جو پڑوسی ریاست ٹاملناڈو کو جوڑتی ہے بھی بارش کے پانی سے شدید طور پر متاثر رہی کیوں کہ سڑکوں پر 4فیٹ پانی بہہ رہا ہے ۔میسورو میں قومی شاہراہ 212پر گاڑیوں کی نقل و حرکت شدید طور پر متاثر ہوئی کیوں کہ ورونا گاوں میں ایک بڑا گڑھا پڑگیا ہے ۔میسورو کے کپنا پارک میں ایک بڑی مگرمچھ دیکھی گئی جس کو دیکھ کر لوگ حیران ہوگئے ۔ یہ مگرمچھ کارنجی نہر سے پارک میں داخل ہوگئی جو اس سے متصل ہے ۔پارک کی صفائی کے لئے آنے والے افراد نے اس تعلق سے محکمہ جنگلات کو اطلاع دی۔اے سی ایف پرکاش اور محکمہ کے دیگر عہدیداروں اکرم ' منجو ' سدالنگیا اور دوسروں نے اس مگرمچھ کو پکڑکر محفوظ مقام پر منتقل کردیا۔ بارش سے این آر محلہ ' سری رام پورہ ' ودیانارائن پورم ' کنکا داس نگر اور دیگر علاقوں کے عوام متاثر رہے ۔ سری رام پور کے کئی علاقو ں میں بارش کا پانی جمع ہوگیا۔ انتظامیہ کی لاپرواہی پر عوام نے احتجاج کرتے ہوئے مانت واڑی کی سڑک پر رکاوٹ پیدا کی۔ گذشتہ شب ہوئی بارش کے سبب جیانگر میں ایک مکان کی چھت گرپڑی اور اس گھر میں رہنے والوں کومعمولی زخم آئے ۔
