حجاج کرام کی شہر واپسی کا سلسلہ مکمل ،حاجیوں کی خدمت کیلئے رضاکاروں کا بے لوث جذبہ بے مثال: روشن بیگ
بنگلورو،4اکتوبر(ایس او نیوز؍عبدالحلیم منصور) امسال سفر حج بیت اﷲ کی ادائیگی کے بعدبنگلور لوٹنے کا سلسلہ تکمیلی مراحل میں پہنچ چکا ہے، 14؍ فلائٹوں کے ذریعہ امسال حج بیت اﷲ کیلئے روانہ ہونے والے حجاج کرام کی بعافیت بنگلور واپسی پر اپنی مسرت کا اظہار کرتے ہوئے وزیر شہری ترقیات وحج جناب روشن بیگ نے اس کیلئے حج کیمپ ، حج بھون اور ایرپورٹ کے حج ٹرمنل پر بے لوث خدمات انجام دینے والے رضاکاروں ، حج کمیٹی کے ممبران اور ایرپورٹ حکام کا شکریہ ادا کیا۔ آج آخری حج فلائٹ کی واپسی سے قبل اخباری نمائندوں سے بات چیت کرتے ہوئے جناب روشن بیگ نے کہاکہ اﷲ کے فضل وکرم سے امسال سفر حج انتہائی اطمینان بخش گزرا ہے، ریاست کے تمام حاجیوں نے جو مکۃ المکرمہ میں عزیزیہ اور گرین زمرے کے تحت سفر پر روانہ ہوئے تھے، وہاں پر ان کیلئے قیام کی بہترین سہولیات مہیا کرائی گئیں ، ساتھ ہی مدینہ منورہ میں بھی حاجیوں کیلئے قیام کے انتظامات کو اطمینان بخش بتایا گیا ہے۔ انہوں نے کہاکہ ہندوستانی حاجیوں بالخصوص کرناٹک سے جانے والے حجاج کرام کیلئے بہترین انتظامات کرنے پر وہ حکومت سعودی عربیہ کی وزارت حج ، ہندوستانی قونصل خانہ برائے سعودی عرب ، انڈین حج مشن اور ملک کی وزارت اقلیتی امور بالخصوص وزیر برائے اقلیتی امور مختار عباس نقوی کے مشکور ہیں۔انہوں نے کہاکہ حج فلائٹوں کی روانگی اور آمد کے مرحلے میں فلائٹ کے اوقات کو لے کر بعض حلقوں میں پریشانی تھی، تاہم اس سلسلے میں انہوں نے مرکزی حکومت سے نمائندگی کی اور فوری طور پرمرکزی حکومت نے کارروائی کرتے ہوئے ان تمام دشواریوں کو دور کیا اور روانگی کے مرحلے میں یہ یقینی بنایا کہ بنگلور سے عشاء پڑھ کر روانہ ہونے والے عازمین حج جدہ کی سرزمین پر نماز فجر ادا کرسکیں، اسی طرح واپسی کے مرحلے میں مدینہ ایرپورٹ پر لگیج کنوینئر بیلٹ کی خرابی کے سبب پہلی دو فلائٹوں کی آمد میں تاخیر ہوئی اس سلسلے میں بھی مرکزی حکومت اور سعودی قونصل برائے ہند سے فوری نمائندگی کے بعد اسی دن اس کنوینئر بیلٹ کی مرمت ہوئی اور بنگلور کے حجاج کی بقیہ بارہ فلائٹس بروقت بنگلور پہنچ گئیں۔ جناب روشن بیگ نے کہاکہ 1996 سے اب تک بنگلور کے تمام حج کیمپس اور گزشتہ دو سال سے حج بھون سے عازمین حج کی روانگی اور اس کے بعد ایرپورٹ پر حجاج کی واپسی کے مرحلے میں رضاکاروں کی جو خدمات انجام دی جارہی ہیں وہ اپنی مثال آپ ہیں، اس طرح کے انتظامات ملک میں شاید ہی کہیں اور ہوتے ہوں گے۔سینکڑوں کی تعداد میں رضاکار اپنی تمام مصروفیات کو بالائے طاق رکھ کر حجاج کرام کی خدمت کیلئے شب وروز لگے رہتے ہیں۔ انہوں نے کہاکہ حجاج کرام سے ان کی یہی گذارش ہے کہ ان کی خدمت میں روانگی اور آمد کے مرحلے میں لگے رہنے والے رضاکاروں کیلئے خصوصی دعا کریں۔