کشمیر مسئلے کو حل کرنے کیلئے بھارت اور پاکستان کے درمیان خیر سگالی ضروری:لابوردے
نیویارک23جولائی(ایس اونیوز/آئی این ایس انڈیا)اقوام متحدہ کے ایک اعلیٰ افسر نے کہا ہے کہ بھارت اور پاکستان کے درمیان کشمیر مسئلے کو حل کرنے کیلئے دونوں ممالک کے درمیان خیر سگالی ضروری ہے۔اقوام متحدہ کی انسداددہشت گردی کمیٹی کے ایگزیکٹو ڈائریکٹوریٹ کے ایگزیکٹو ڈائریکٹر جین پال لابوردے نے ہندوستان اور پاکستان کے درمیان کشمیر مسئلہ اور اس جدوجہد کی وجہ سے علاقے میں دہشت گردی کے مسئلے پر پوچھے گئے ایک سوال کے جواب میں کہاکہ ہمیں رکن ممالک کی خیر سگالی کی بھی ضرورت ہے۔رکن ممالک کی خیرسگالی کے بغیر ہم کس طرح اس کو حل کر سکتے ہیں۔دہشت گردی کے معاملے پر لابوردے نے کہا کہ دنیا بھر کے تقریباََ100ممالک سے 30000سے زیادہ غیر ملکی دہشت گرد جنگجو ہیں اور ایسے میں دہشت گردی ایک عالمی خطرہ ہے جس سے نمٹنے کیلئے ایک جامع اور مربوط جواب کی ضرورت ہے۔انہوں نے کہاکہ اس میں کوئی شک نہیں کہ دہشت گردی سے خطرہ بنا ہوا ہے اور بد قسمتی سے کئی مقامات پر ہوئی واقعات سے یہ خطرہ صحیح لگتا ہے۔لابوردے نے کہاکہ کوئی بھی ملک تنہااس مسئلے سے لڑنے کی پوزیشن میں نہیں اور نہیں لڑ سکتا۔