بنگلورو،22؍نومبر(ایس او نیوز) ریاستی کابینہ میں ردوبدل کے متعلق قیاس آرائیوں کے درمیان آج نائب وزیراعلیٰ نے یہ بیان دے کر وزارت کے دعویداروں کے حوصلے پست کردئے کہ صدر کانگریس راہل گاندھی جیسے ہی منظوری دیں گے کابینہ میں ردوبدل کا عمل آگے بڑھایا جائے گا۔ جبکہ صدر کانگریس راہل گاندھی ان دنوں پانچ ریاستوں کی انتخابی مہم کے سلسلے میں مکمل طور پر مصروف ہیں۔

کہاجارہاتھا کہ رواں ماہ کے آخر میں کسی بھی وقت کابینہ میں توسیع اور ردوبدل کی جاسکتی ہے۔ بعض سیاسی حلقوں میں کابینہ میں توسیع کی تاریخ کا تعین بھی کردیا گیا تھا اور بتایاجارہاتھاکہ 28 نومبر کو کابینہ میں ردوبدل ہوسکتی ہے۔ لیکن اب ڈاکٹر پرمیشور کا یہ بیان کہ صدر کانکریس راہل گاندھی کی منظوری کے فوراً بعد کابینہ میں توسیع کی جائے گی، یہ واضح اشارہ ہے کہ کابینہ میں توسیع کا عمل پانچ ریاستوں کے ووٹوں کی گنتی کے بعد ہی ممکن ہے۔ ان ریاستوں میں ووٹوں کی گنتی 11 دسمبر کو ہونے والی ہے۔

ڈاکٹر پرمیشور کا یہ بیان وزارت کے دعویداروں میں مایوسی کا سبب بنا ہوا ہے۔ نائب وزیراعلیٰ نے آج کہاکہ کابینہ میں توسیع کے متعلق کرناٹک میں کانگریس امور کے انچارج کے سی وینو گوپال سے بات چیت کی گئی ہے۔ اب صدر کانگریس راہل گاندھی سے اجازت کا انتظار ہے، چونکہ راہل گاندھی مختلف ریاستوں کی انتخابی مہم میں لگے ہوئے ہیں اسی لئے ان سے ملاقات کا وقت نہیں مل سکا۔ اگر موقع ملتا ہے تو فوری طور پر ان سے کابینہ میں توسیع کی منظوری حاصل کرلی جائے گی۔

ڈاکٹر پرمیشور نے کہاکہ سبھی کانگریس قائدین اسی تیاری میں ہیں کہ رواں ماہ کے آخر تک کابینہ میں توسیع کے لئے راہل گاندھی سے نمائندگی کی جائے ، لیکن اب تک ان سے ملاقات کا وقت طے نہیں ہوپایا ہے، جیسے ہی وقت طے ہوجائے گا ریاستی قائدین ایک بار پھر راہل گاندھی سے ملاقات کرکے کابینہ میں توسیع کے لئے منظوری حاصل کرلیں گے۔ پچھلے تین ماہ سے ریاستی کابینہ میں توسیع کے معاملے میں اسی طرح کا ٹال مٹول ہوتا رہا ہے، ہر بار کسی نہ کسی بہانے سے کابینہ میں توسیع کے عمل کو ملتوی کیا جارہا ہے۔ آنے والے لوک سبھا انتخابات کے مرحلے میں کانگریس میں کسی طرح کی بے چینی نہ رہے اور برگشتہ سرگرمیوں کااثر لوک سبھا انتخابات میں پارٹی کے امکانات پر نہ پڑے اسی لئے پارٹی کی مرکزی قیادت کو ریاستی قائدین نے باور کروایا ہے کہ کابینہ میں توسیع اور سرکاری بورڈز اور کارپوریشنوں کے لئے چیرمینوں کے تقرر کو انجام دینے کے ساتھ ہی ریاست میں برگشتہ سرگرمیوں کو کافی حد تک قابومیں کیاجاسکتا ہے۔ ایک طرف 11 دسمبر کو پانچ ریاستوں کے نتائج کا اعلان ہوگا تو دوسری طرف 10 دسمبر سے بلگاوی میں لیجسلیچر کا سرمائی اجلاس شروع ہورہا ہے۔ ایسے میں کابینہ میں توسیع اور ردوبدل کا خیال بھی 20دسمبر کے بعد یا غالباً 2019 کے آغاز پر ہی کیا جاسکتاہے۔