راہول گاندھی کانگریس صدارت جنوری میں بنگلورو میں سنبھالیں گے
بنگلورو،4اکتوبر(ایس او نیوز؍عبدالحلیم منصور) کل ہند کانگریس نائب صدر راہل گاندھی کی کانگریس صدر کے طور پر تاج پوشی آئندہ سال جنوری میں بنگلورو میں ہوگی۔پہلے کہا گیا تھا کہ رواں سال آگست یا ستمبر ہی میں تاج پوشی ہوجائے گی ۔لیکن اب گجرات اسمبلی انتخابات کی تاریخوں کے اعلان کے بعد یہ تقریب ملتوی کردی گئی ہے۔ذرائع نے بتایا کہ گجرات انتخابات کی رائے شماری اور رجحان دیکھ کر قطعی فیصلہ کیا جائے گا۔اگر گجرات میں کانگریس کے جیتنے کا امکان ہوتو انتخابات سے پہلے ہی سونیا گاندھی صدارت کی ذمہ داری اپنے فرزند راہل گاندھی کو سونپ سکتی ہیں۔گجرات انتخابات کے بارے میں اگر پیچیدگی ہو تو جنوری 2018ء میں رسم تاج پوشی منعقد ہوگی۔اگر نومبر میں کانگریس کی بڑی کانفرنس منعقد ہوگی تو جنوری میں سیلی کان سٹی بنگلور میں رسم تاج پوشی منعقد ہوگی۔اس بارے میں اس ماہ کے اواخر میں نئی دہلی میں تیاریوں کی میٹنگ منعقد ہوگی۔بنگلور میں کانگریس کی بڑی کانفرنس اور رسم تاج پوشی مقرر ہے۔کے پی سی سی نے اس بارے میں ہائی کمان کو اپیل روانہ کی تھی ۔ریاست میں پارٹی کی حکومت رہنے اور آئندہ انتخابات کے پیش نظر بنگلور ہی کا انتخاب کیا گیا ہے ۔قبل ازیں آگست یا ستمبر ہی میں کانگریس کی بڑی کانفرنس منعقد ہونے والی تھی ۔ ڈگ وجئے سنگھ جب ریاست کے پارٹی امور نگران تھے تو ریاست کے لیڈروں کی منظوری لی تھی۔لیکن سونیا گاندھی نے اس وقت راہل گاندھی کو عہدہ سونپنے کیلئے مصمم ارادہ نہیں کیا تھا اس لئے اسے ملتوی کردیا گیا۔ریاست کے ایک سینئر لیڈر نے بتایا کہ راہل گاندھی کے کانگریس صدر بن جانے سے ریاست میں پارٹی کی انتخابی مہم زور پکڑے گی۔