محکمۂ توانائی میں تمام طبقات کو پرموشن میں ریزرویشن: ڈی کے شیوکمار
بنگلورو،20؍فروری(ایس او نیوز) ریاستی وزیر توانائی ڈی کے شیوکمار نے کہاکہ درج فہرست ذاتوں اور قبائل کو پرموشن میں دئے گئے ریزرویشن کو منسوخ کرتے ہوئے سپریم کورٹ کی طرف سے جو حکم دیا گیا ہے اس پر ریاستی کابینہ میں تبادلۂ خیال کیا جائے گا۔ اخباری نمائندوں سے بات چیت کرتے ہوئے انہوں نے کہاکہ محکمۂ توانائی میں درج فہرست طبقات کیلئے پرموشن میں ریزرویشن رائج تھا۔ انہوں نے کہاکہ سپریم کورٹ کے اس حکم کو برقرار رکھنے کیلئے ایک طرف انجینئروں کا طبقہ زور دے رہا ہے تو دوسری طرف اس حکم پر نظر ثانی کی اپیل کرنے پر بھی زور دیا جارہا ہے۔بہت جلد کے پی ٹی سی ایل اور دیگر الیکٹری سٹی کمپنیوں کے افسران اور انجینئروں کے ساتھ ایک میٹنگ طلب کی جائے گی، جس میں یہ طے کیا جائے گا کہ درج فہرست طبقات کے ساتھ پسماندہ طبقات ، اقلیتوں اور عام طبقات کیلئے بھی پرموشن میں ریزرویشن مقرر کیا جائے۔ انہوں نے کہاکہ اس نظام کو اپنانے سے صد فیصد انجینئرس 80 فیصد سپرنٹنڈنٹ ، 32، فیصد اسسٹنٹ ایگزی کیٹیو انجینئرس کو از خود ترقی مل جائے گی۔انہوں نے کہاکہ اس سلسلے میں ریاستی حکومت نے اڈوکیٹ جنرل کو ایک مکتوب روانہ کیا ہے۔ 1978میں اس خصوصی پرموشن اسکیم کو رائج کیا گیا تھا، جسے سپریم کورٹ نے 9 ؍ فروری کو مسترد کردیا۔عدالت عظمیٰ کے فیصلہ کے پیش نظر حکومت نے تمام طبقات کو پرموشن میں ریزرویشن دینے کا فیصلہ کیا ہے۔