فروغ ہنر سے استفادہ کرنے انجینئروں کو آواز
بنگلورو۔27؍ جولائی(سیاست نیوز) وشویشوریا ٹیکنیکل یونیورسٹی کی طرف سے دو سو کروڑ روپیوں کی لاگت پر فروغ ہنر مرکز قائم کیاگیا ہے ،جہاں ڈگری یافتہ انجینئرس مختلف فنون کی تربیت کا استفادہ کرسکتے ہیں اور اپنی تعلیم کے ساتھ منتخب ہنر میں غیر معمولی مہارت حاصل کرسکتے ہیں۔ یہ بات آج اس فروغ ہنر سنٹر کے وائس چانسلر ڈاکٹر کری بسپا نے کہی۔ شہر کے امبیڈ کر ٹیکنیکل یونیورسٹی کے چوتھے کانوکیشن میں انجینئر طلبا کو ڈگریاں تفویض کرنے کے بعد خطاب کرتے ہوئے انہوں نے کہاکہ یونیورسٹی کی طرف سے شمالی کینرا ڈانڈیلی اور مدینا ہلی میں فروغ ہنر مراکز قائم کردئے گئے ہیں ، ان نئے مراکز میں انجینئرنگ طلبا کو خصوصی تربیت سے آراستہ کرنے کیلئے دفاع ، اسرو اور انجینئرنگ شعبے کی نامور کمپنیوں سے وابستہ ماہرین سے رابطہ کیاگیا ہے اور انہیں طلب کرکے خصوصی لکچرس کا اہتمام کیا جائے گا۔ اس تقریب میں انجینئرنگ شعبے کے 181الیکٹرانکس اور کمیونیکیشن شعبے کے 160 امیدواروں کو ڈگری دی گئی ، سیول انجینئرنگ شعبے کے 58 امیدوار، الیکٹرانک اور الیکٹریکل 63طلبا، انڈسٹریل انجینئرنگ کے 25طلبا انسٹرو منٹ ٹیکنالوجی کے 44طلبا ، کمپیوٹر سائنس کے 126 طلبا ، ٹیلی مواصلات کے 51 طلبا ، میڈیکل الیکٹرانک کے 21طلبا سمیت 800طلبا کو ڈگریاں پیش کی گئیں۔
