ہاسن،24؍ مارچ (ایس او نیوز) فرقہ پرست پارٹی کو اقتدار سے دور رکھنے کے مقصد سے کانگریس۔ جے ڈی ایس پارٹیوں نے اتحاد تشکیل دیا ہے۔ہاسن لوک سبھا حلقہ سے میرا پوتہ پرجول ریونا میدان میں ہے۔ ہاسن کے عوام سے اُمید ہے کہ وہ پرجول کو جتائیں گے ۔ یہ باتیں جے ڈی ایس کے سربراہ ایچ ڈی دیوے گوڈا نے کہیں۔

شہر کے تحصیلدار دفتر کے قریب منعقدہ جے ڈی ایس کے اجلاس سے خطاب کرتے ہوئے انہوں نے کہا کہ ہاسن ضلع میں آپ تمام کے آشیرواد سے 60؍ سال سے سرگرم سیاست میں ہوں ، میں حلقہ چھوڑ جارہا ہوں ۔ ایسا اندیشہ وخدشہ کسی کے دل میں نہیں ہونا چاہئے میں اپنے پوتے کو آپ کی گود میں ڈال رہا ہوں۔ اس کو بھی اپنا آشیرواد دیں اور حلقہ کی خدمت کرنے کا موقع دیں۔ پرجول ریونا غلط راہ پر چلتا ہے گوشمالی کرتے ہوئے راہ راست پرلانے کی طاقت اب بھی میرے پاس ہے، یہ طاقت مجھے آپ سے ملی ہے۔ گزشتہ کئی برسوں سے ضلع میں کانگریس اور جے ڈی ایس والے رسہ کشی کرتے ہوئے آئے ہیں۔ لیکن اب ہم خدا کی مرضی سے ایک ہوگئے ہیں۔ فرقہ پرست پارٹی ضلع میں اپنی جڑ نہ پھیلائے اس مقصد کے تحت ہم نے اتحاد رچایا ہے۔ اس موقع پر ریاستی وزیر برائے اعلیٰ تعلیم جی ٹی دیوے گوڈا نے کہا کہ کانگریس۔ جے ڈی ایس دونوں پارٹیاں ایک ہوں اور مشترکہ طور پر کام کریں یہ خواہش دیوے گوڈا کی تھی ۔ آج یہ خواہش تکمیل کو پہنچی ہے۔

مرکزی حکومت پر تنقید کرتے ہوئے انہوں نے کہا کہ وزیراعظم نریندر مودی روزگار فراہم کرنے کے معاملہ میں بالکل ناکام ہوگئے ہیں۔ کسی بھی ایک شعبہ میں مودی روزگار کے مواقع پیدا نہیں کرسکے صرف موبائل، نیٹ ورک کو ترجیح دیتے ہوئے روزگار کے مواقع پیدا نہیں کئے جاسکتے۔ بی جے پی جھوٹے وعدوں کے ذریعے برسراقتدار آئی ہے۔ بی جے پی کو اقتدار سے بے دخل کرنے کے لئے کانگریس ۔ جے ڈی ایس اتحاد تشکیل پایا ہے۔ ایک سوال کا جواب دیتے ہوئے جی ٹی دیوے گوڈا نے کہا کہ منڈیا میں نکھل کمارسوامی اپنی جیت درج کریں گے۔ وہاں کے عوام خود کہہ رہے ہیں کہ وہ نکھل کمار کے علاوہ کسی اور کو ووٹ نہیں دیں گے۔ اس پروگرام میں رکن اسمبلی وائی ایس دتہ، ایم ایل سی گوپال سوامی ، کڈور اسمبلی حلقہ کی سابق ایم ایل اے گائتری شانتا گوڈا ، ایس ایم آنند، ناڈگوڈا ودیگر شریک رہے۔ پروگرام میں بروز جمعہ دل کا دورہ پڑنے سے انتقال کرنے والے منسپل انتظامیہ کے وزیر شیولی کو ایک منٹ کی خاموشی کے ذریعہ خراج عقیدت پیش کی گئی۔