بنگلورو،10؍دسمبر(ایس او نیوز) کرناٹک پولیس اور ٹرانسپورٹ محکمہ نے واضح کیا ہے کہ اکتوبر 2018 تک ان کے ذریعہ ٹریفک ضابطوں کی خلاف ورزی سے متعلق مختلف معاملات کے لئے ضبط کر دہ کل 19,868 سواریوں کو فروخت کر دیا گیا ہے۔البتہ اب بھی 18,477 گاڑیاں ریاست کے مختلف پولیس تھانوں میں کھڑی ہوئی ہیں جن کو فروخت کرنا باقی ہے۔

واضح رہے کہ لوک آیوکتہ نے ایک شکایت کی بنیاد پر پولیس اور ٹرانسپورٹ محکمہ کو ہدایت دی تھی کہ وہ ضبط کر دہ گاڑیوں کی نیلامی سے متعلق صورت حال کی رپورٹ لوک آیوکتہ میں پیش کریں،مذکورہ شکایت سدا لنگے گوڈا کی طرف سے داخل کی گئی تھی۔

پولیس محکمہ کی طرف سے جو رپورٹ داخل کی گئی ہے اس میں کہا گیا ہے کہ سال 2015 سے 2018 (اکتوبر) تک کل 19,868 گاڑیوں کو نیلام کیا گیا ہے۔اس رپورٹ کی روشنی میں لوک آیوکتہ نے کہا ہے کہ ’’افسران کا کہنا ہے کہ اگر پولیس محکمہ کو مزید چار ماہ کا وقت دیا جاتا ہے تو وہ نیلامی کے قابل سواریوں کی تعداد میں قابل قدر حد تک کم پیدا کر سکتے ہیں بلکہ ممکن یہ ہے کہ اگلے چار ماہ میں نیلامی کے لئے صرف پانچ فیصد گاڑیاں ہی باقی رہ جائیں گی‘‘۔

لوک آیوکتہ نے مزید کہا ہے کہ ’’محکمہ کی طرف سے میری ہدایات پر عمل کرنے کے سلسلہ میں عمدہ رد عمل کا اظہار ہوا ہے اور انہوں نے موثر اقدامات کئے ہیں اور بڑی تعداد میں ضبط کر دہ گاڑیوں کی نیلامی کا کام انجام پایا ہے، اسی پس منظر میں باقی بچی ہوئی گاڑیوں کی نیلامی کے لئے انہیں مزید چار ماہ کا وقت فراہم کیا جاتا ہے‘‘۔

پولیس محکمہ کی طرف سے جو رپورٹ داخل کی گئی ہے اس کے مطابق محکمہ کی طرف سے سال 2018 میں اکتوبر کے مہینہ تک کل ایک لاکھ 57 ہزار گاڑیاں ضبط کی گئی تھیں جن پر دعویٰ کرنے والے کوئی بھی آگے نہیں آئے ہیں ، ان غیر مطلوبہ ضبط کر دہ گاڑیوں میں سے پولیس محکمہ نے کل ایک لاکھ 39 ہزار گاڑیوں کو نیلام کر دیا ہے۔