نئی دہلی:19/جولائی(ایس او نیوز /ٓئی این ایس انڈیا)شمال مشرقی ریاستوں کی ترقی کے مرکزی وزیرمملکت(آزادانہ چارج)، نیز وزیراعظم کے دفتر ،عملے،عوامی شکایات، پنشن،جوہری توانائی اور خلا کے مرکزی وزیرمملکت ڈاکٹر جتیندر سنگھ نے آج راجیہ سبھا میں پوچھے گئے ایک سوال کے تحریری جواب میں اطلاع دی کہ دہلی میں نارتھ ایسٹرن کلچرل اینڈ انفارمیشن سینٹر یعنی شمال مشرقی ثقافتی و اطلاعاتی مرکز کی عمارت کی تعمیر کے مقصد سے5341.75 مربع میٹر(1.32ایکڑ)طویل زمین کا ایک پلاٹ دہلی ڈیولپمنٹ اتھارٹی( ڈی ڈی اے) سے حاصل کر لیا گیا ہے۔ سینٹرل پبلک و رکس ڈپارٹمنٹ (سی پی ڈبلیو ڈی )کو اس عمارت کی تعمیر اور فن تعمیر کے لئے صلاح ومشورہ کی ذمہ داری سونپی گئی ہے۔نارتھ ایسٹرن کاؤنسل(این ای سی) نے اس عمارت کی تعمیر کا کام شروع کرنے کے لئے فنڈز مختص کردیئے ہیں۔نارتھ ایسٹرن کلچرل اینڈ انفارمیشن سینٹر کی مجوزہ سرگرمیوں میں شمال مشرق میں واقع آٹھ ریاستوں کی تاریخ، تہذیب، ثقافتی ورثے، تہواروں ، میلوں اورکھانے کی تصویر پیش کرنے کے علاوہ سیاحت کو فروغ دینے کے لئے سہولتوں کے قیام اور قومی راجدھانی ، دہلی میں مشترکہ سہولتی مرکز ،لائبریری، علم اور وسائل کے مرکز کا قیام جیسے امور شامل ہیں۔