نئی دہلی4ستمبر (ایس او نیوز؍آئی این ایس انڈیا) پٹرول۔ڈیزل کی قیمتوں میں آج ریکارڈ 10 ویں دن اضافہ جاری ر ہا۔ ممبئی میں پٹرول قریب 87 روپے فی لیٹر فروخت ہو رہا ہے تو دہلی میں اس کی قیمت 79 روپے فی لیٹر پر پہنچ گئی ہے۔ وہیں ڈیزل کی قیمتوں میں بھی تاریخی اضافہ جاری ہے۔ تیل کمپنیوں نے قومی دارالحکومت میں دیر رات پٹرول کی قیمت میں 31 پیسے فی لیٹر اور ڈیزل کی قیمت میں 29 پیسے فی لیٹر کا اضافہ کیا۔ اس کے ساتھ ہی پیٹرول کی قیمت دہلی میں 79 روپے 15 پیسے اور ڈیزل 71 روپے 15 پیسے فی لیٹر ہو گئی۔ وہیں ممبئی میں پٹرول آج 86 روپے 56 پیسے اور ڈیزل 75 روپے 54 پیسے فی لیٹر کی قیمت پر فروخت ہو رہا ہے۔ تیل کمپنیوں نے کل کے مقابلے ڈیزل کی قیمتوں میں 42 پیسے اور پٹرول کی قیمتوں میں 31 پیسے فی لیٹر کا اضافہ کیاہے۔ کولکتہ میں پٹرول کی قیمت 30 پیسے اور ڈیزل کی قیمت 39 پیسے فی لیٹر بڑھائی گئی ہے۔ اس کے ساتھ ہی شہر میں پٹرول کی قیمت 82 روپے 06 پیسے اور ڈیزل کی قیمت 74 روپے فی لیٹر کی پہنچ گئی ہے۔واضح ہو کہ ڈیزل کی قیمتوں میں اضافہ کی وجہ سے مہنگائی بڑھ سکتی ہے، کیونکہ کھانے اور زرعی مصنوعات کی نقل و حمل کے لئے گاڑیوں میں ڈیزل ہی استعمال ہوتا ہے۔ پٹرول ڈیزل کی بڑھتی ہوئی قیمتوں کو لے کر اپوزیشن مودی حکومت تنقیدکی زد میں ہے۔مخالف پارٹیاں بی جے پی اور وزیر اعظم نریندر مودی کو پرانے وعدوں کی یاد دلا رہی ہیں ۔ کانگریس کے خصوصی ترجمان سرجے والا نے گزشتہ دنوں ٹویٹ کر کہاکہ ضروری سامانوں کی بڑھتی ہوئی قیمت تمام ہندوستانیوں کے بجٹ کو برباد کر رہی ہے۔ انہوں نے کہاکہ ملک کے لوگ ایندھن لوٹ کے لئے مودی حکومت کو کبھی معاف نہیں کریں گے اور آنے والے انتخابات میں اس کا منہ توڑ جواب بھی دیں گے۔