بنگلورو،19؍جون(ایس اونیوز) ٹمکور ضلع اور آس پاس کے علاقوں میں رہنے والے لوگوں کی سہولت کیلئے مرکزی وزارت خارجہ نے ٹمکور ضلع کیلئے ایک پاسپورٹ سیوا کیندرا قائم کرنے کی منظور ی دیتے ہوئے حکنامہ جاری کیا ہے۔ یہ بات ٹمکور کے رکن پارلیمان ایس پی مدو ہنومے گوڈا نے ایک اخباری بیان میں بتائی۔ انہوں نے کہاکہ کافی عرصہ سے وہ مرکزی حکومت خاص طور پر وزارت خارجہ سے مسلسل نمائندگی کررہے تھے۔ یہاں کے لوگوں کو پاسپورٹ حاصل کرنے کیلئے ماضی میں بنگلور کا رخ کرنا پڑتا۔ اس سے لوگوں کو کافی پریشانی ہورہی تھی، تاہم وزارت خارجہ نے ان کی گذارش کو منظور کرتے ہوئے پاسپورٹ سیوا کیندرا ٹمکور میں بھی قائم کرنے کی منظوی دی ہے۔اس کیلئے وہ مرکزی حکومت کے مشکور ہیں۔ انہوں نے کہاکہ ماضی میں پاسپورٹ کی تیاری کیلئے درخواست جمع کرنے لوگوں کو نہ صرف بنگلور کے پاسپورٹ سیوا کیندروں کا رخ کرنا پڑتا، بلکہ اس کے ساتھ پاسپورٹ ویریفکیشن کا مرحلہ بھی انتہائی دشوار گزار تھا۔ان تمام دشواریوں کو دیکھتے ہوئے انہوں نے ٹمکور میں پاسپورٹ سیوا کیندرا کے قیام کے ساتھ پولیس ویر فکیشن کی سہولت بھی یہاں پر قائم کرنے میں کامیابی حاصل کی ہے۔ انہوں نے کہاکہ اس سے ٹمکور ضلع کے کسانوں اور دیگر شعبوں سے وابستہ لوگوں کو کافی مدد ملے گی۔