پنجی ،15؍ اکتوبر (ایس او نیوز؍آئی این ایس انڈیا ) گوا کانگریس نے صدرجمہوریہ رام ناتھ کووند سے پیر کو یقینی بنانے کی درخواست کی کہ کوئی غلط ہتھکنڈہ اپناکر ریاستی اسمبلی تحلیل نہ ہو۔گوا کانگریس کمیٹی کے سربراہ نے اپنے ریمارکس میں صدر جمہوریہ کو اس بات سے مطلع کیا کہ انہوں نے ریاست میں حکومت بنانے کا دعوی پیش کرنے کے تعلق سے گورنر مردلا سنہا کو کئی بار معلومات دی ہیں ۔

انہوں نے کہا کہ یہ ضروری ہے کہ صدر گورنر کو ہدایت دیں اور ان کی رہنمائی کریں تاکہ اسمبلی تحلیل کرنے کی کوشش میں کوئی آئین سے سوا قدم نہ اٹھایا جائے۔ کانگریس 40 رکنی گوا اسمبلی میں سب سے بڑاجماعت ہے اور اس کے پاس 16 ممبران اسمبلی ہیں۔ پاریکر حکومت کو 23 ممبران اسمبلی کی حمایت حاصل ہے۔ بی جے پی پر گوا میں اقتدار کی بھوک کا الزام لگاتے ہوئے کانگریس نے سنیچر کو مانگ کی تھی کہ وزیر اعلی منوہر پاریکر استعفیٰ دیں اور اس اسمبلی میں ایک خصوصی اجلاس بلا کر اکثریت ثابت کرنے کی اجازت دی جائے۔پاریکر فروری کے وسط سے بیمار ہیں اور ان کا گوا، ممبئی اور امریکہ سمیت کئی مقامات کے ہسپتالوں میں علاج ہو چکا ہے۔ وہ اتوار کو دہلی سے یہاں ایک خصوصی طیارے سے واپس آئے۔ وہ دہلی کے ایمس میں بیماری کا علاج کرا رہے تھے۔