اپنے کسی بھی ممبر اسمبلی کو لوک سبھا انتخابات میں نہیں اتارے گی عام آدمی پارٹی
نئی دہلی، 23؍جنوری (ایس او نیوز؍ایجنسی) عام آدمی پارٹی آئندہ لوک سبھا انتخابات میں اپنے موجودہ ممبراسمبلی اور وزرا کو ٹکٹ نہیں دے گی۔ عآپ کے سینئر لیڈر گوپال رائے نے منگل کو یہ جانکاری دی ہے۔ عام آدمی پارٹی کی دہلی یونٹ کے صدر رائے نے ساتھ ہی کہا کہ انتخابات کی اطلاع جاری ہونے سے کافی پہلےہی دہلی م پنجاب اور ہریانہ کیلئے پارٹی امیدواروں کا اعلان کر دیا جائے گا۔
وہیں صحافیوں نے جب ان سے پوچھا کہ کیا پارٹی اپنےممبران اسمبلی اور وزرا کو انتخابی میدان میں اتارے گی تو انہوں نے کہا 'ہم اپنے موجودہ ممبر اسمبلی کو ٹکٹ نہیں دینے جا رہے ہیں۔ سبھی لوگ خواہشمند ہیں لیکن ہم انہیں ٹکٹ نہیں دیں گے'۔
عام آدمی پارٹی دہلی کی سات پارلیمانی سیٹ میں چھ کیلئے انچارج کا پہلے ہی اعلان کر چکی ہے۔ بس مغربی دہلی سیٹ کیلئے انچارج کا اعلان ابھی باقی ہے۔ اس بارے میں سوال کرنے پر انہوں نے کہا، ' ہم دہلی ، ہریانہ اور پنجاب میں انتخابات کا اعلان ہونے سے کافی پہلے اپنے امیدواروں کا اعلان کر دیں گے'۔
بتادیں کہ آپ نے کانگریس کے ساتھ اتحاد کے امکانات کو خارج کرتے ہوئے تینوں ریاستوں میں اکیلے ہی لوک سبھا انتخابات کا فیصلہ کیا ہے۔