ریاستی انتخابات : تمام کو ٹکٹ دینا ممکن نہیں : سدارامیا
میسور ،4اکتوبر(ایس او نیوز؍عبدالحلیم منصور) وزیراعلیٰ سدارامیا نے آج کہا ہے کہ انتخابات کے دوران پارٹی ٹکٹ کے لئے ہر کسی کی جانب سے عرضی داخل کرنا عام بات ہے لیکن تمام عرضی گذاروں پر غور نہیں کیا جاسکتا۔انہوں نے میڈیا سے بات کرتے ہوئے کہا '' جب انتخابات قریب آتے ہیں تو پارٹی میں ہر کوئی ٹکٹ کا مطالبہ کرتا ہے اور ایسے مطالبات کرنے والے تمام افراد کو ہم ٹکٹ نہیں دے سکتے ۔انتخابات میں ہر طبقہ ووٹ ڈالتا ہے ۔ صرف ایک طبقہ نہیں ۔ اسی لئے تمام طبقات کے افراد کو ٹکٹ دیا جائے گا۔ یہ فیصلہ پارٹی ہائی کمان کا ہے ۔ '' جے ڈی ایس کے رکن اسمبلی جی ٹی دیوے گوڑا کے کانگریس میں شامل ہونے سے متعلق ایک سوال کا جواب دیتے ہوئے انہوں نے کہا '' میں ایسی قیاس آرائیوں کا جواب نہیں دوں گا اور ایسی افواہیں ان دنوں جنگل کی آگ کی طرح پھیلائی جارہی ہیں۔ سدارامیا نے اشارہ دیا کہ 2018کے انتخابات ان کے آخری انتخابات ہوں گے ۔ انہو ں نے اعلان کیا کہ وہ آئندہ اسمبلی کے انتخابات کے لئے کرونا حلقہ کے بجائے چامنڈیشوری حلقہ سے حصہ لیں گے جس نے سیاسی طور پر انہیں دوبارہ زندہ کیا ہے ۔ورنا اسمبلی حلقہ سے ان کے بیٹے کے انتخابات میں حصہ لینے کا حوالہ دیتے ہوئے انہوں نے کہا کہ پارٹی ہائی کمان اس بات کا فیصلہ کرے گی ۔