نئی دہلی ،19؍ ستمبر (ایس او نیوز؍آئی این ایس انڈیا) مظفر پور شیلٹر ہوم ریپ کیس معاملے میں سپریم کورٹ نے جانچ کے لئے سی بی آئی کی نئی ٹیم تشکیل کرنے کے پٹنہ ہائی کورٹ کے حکم پر روک لگادی ہے۔ عدالت نے کہا ہے کہ سی بی آئی ڈائریکٹر کی طرف سے تشکیل ٹیم میں کوئی تبدیلی کی ضرورت نہیں ہے۔11ستمبر کو سپریم کورٹ نے پٹنہ ہائی کورٹ کے ذریعہ مظفر پور شیلٹر ہوم میں بچیوں کے ساتھ ریپ کے معاملے کی میڈیا کوریج پر روک لگانے کے حکم کے خلاف داخل عرضی پر سماعت کرتے ہوئے بہار حکومت اور سی بی آئی کو نوٹس جاری کیا تھا۔ عدالت نے کہا تھا کہ میڈیا کے بارے میں جاری ہدایات پر عمل ہونا چاہئے۔ رپورٹنگ پر پوری طرح روک صحیح نہیں لگتی ہے۔ عدالت نے ریپ متاثرین سے بات کرنے کے لئے وکیل کی تقرری کرنے کے پٹنہ ہائی کورٹ کے حکم پر روک لگادی تھی۔ عرضی بہار کی صحافی نیویدتا جھا نے داخل کی ہے۔ آپ کو بتادیں کہ گزشتہ23اگست کو پٹنہ ہائی کورٹ نے اس معاملے کی میڈیا کوریج پر پابندی لگادی تھی۔ نویدتا جھا نے وکیل فوزیہ شکیل کے ذریعہ داخل عرضی میں کہا تھا کہ گزشتہ سال اپریل میں ٹاٹاانسٹی ٹیو آف سوشل سائنس کی رپورٹ میں شیلٹر ہوم میں بچیوں کے جنسی زیادتی کا انکشاف کیا گیا تھا۔ جب اخباروں اور ٹی وی چینلوں نے اس خبر کو اہمیت سے دکھایا تب پولس نے ایف آئی آر درج کرکے جانچ شروع کی۔ ملک کی سیاست میں مظفر پور شیلٹر ہوم معاملے نے بھونچال لا دیا ۔ بہار حکومت کے ایک وزیر کو بھی استعفیٰ دینا پڑا تھا۔ سپریم کورٹ نے بھی اس معاملے میں از خود نوٹس لیا۔