لڑکیوں کی تعلیم کو اہمیت دینا ضروری:گورنر واجو بھائی والا
بنگلور۔23اپریل( ایس او نیوز)ریاستی گورنر واجو بھائی روڈا بھائی والا نے کہا کہ خواتین کی تعلیم کو اہمیت دےئے بغیر ترقی ناممکن ہے اس لئے لڑکیوں کی تعلیم کو زیادہ اہمیت دینا ضروری ہے ۔الال شہر میں سید مدنی چاری ٹیبل ٹرسٹ کے 35ویں جلسہ کاافتتاح اور بنات کالج کے لئے سنگ بنیاد رکھنے کے بعد گورنر نے اس خیال کااظہار کیا ۔ اورکہا کہ خواتین کا احترام کرنے والا سماج میں ترقی کی منزلیں طے کرسکتا ہے ۔ ان کی بے حرمتی کرنے والا سماج ملک یا ریاستیں ترقی نہیں کرسکتیں۔ انہوں نے مالدار طبقہ کو آواز دی کہ اپنی لڑکیوں کے ساتھ ساتھ دیہی علاقوں کی لڑکیوں کو گود لے کرانہیں اعلیٰ تعلیم فراہم کریں اور لڑکیوں کی تعلیمی ترقی میں اہم رول ادا کریں ۔ انہوں نے سید مدنی ٹرسٹ الال کی جانب سے گرلز کالج کے قیام کے قدم کو سراہا اور کہا کہ ملک میں مختلف مذاہب کی موجود گی کے باوجود انسانیت سب سے اہم ہے اور ہندوستانیوں کو چاہئے کہ دنیا کے کسی بھی کونے میں کیوں نہ رہے ہوں ملک کو فراموش نہ کریں ۔ خصوصی طور پر طلباء آپسی محبت ، مذہبی رواداری پرقائم رہیں۔ ریاستی گورنر نے ٹرسٹ کے مذہبی وسماجی خدمات کو بھی سراہا اورنیک خواہشات کااظہار کیا ۔ اس موقع پر جنوبی کنڑا ضلع نگراں کار وزیر رماناتھ رائے، وزیر برائے خوراک وشہری رسدات ، یوٹی ۔ قادر ، رکن اسمبلی محی الدین باوا ، بی ۔زیڈ ضمیراحمد خان، الال بلدیہ صدر کنی مونوہنے پویا یونیورسٹی کے وائس چانسلر عبداللہ کے علاوہ دیگراہم شخصیات موجود تھیں۔ تقریب کی صدارت سید مدنی چاری ٹیبل ٹرسٹ کے صدر حاجی عبدالرشید نے کی ۔ اس موقع پرمختلف شعبہ جات میں خدمت انجام دینے والوں کو تہنیت پیش کی گئی ۔