نئی دہلی؍بنگلورو۔26؍مئی (ایس او نیوز) آج ریاست وملک کے معروف مشائخ وصوفیائے کرام نے راجیہ سبھا کے اپوزیشن لیڈر اور اے آئی سی سی کے جنرل سکریٹری غلام نبی آزاد سے ملاقات کرتے ہوئے ان کی توسط سے صدر کانگریس راہل گاندھی کو میمونڈم پیش کرتے ہوئے مطالبہ کیا کہ ریاست کرناٹک میں سرکردہ رہنما آر روشن بیگ کو نائب وزیر اعلیٰ کے عہدہ سے سرفراز کیا جائے۔

وفد نے بتایا کہ کرناٹک میں مسلمانوں نے متحد ہوکر کانگریس پارٹی کی حمایت کی ہے جس کے سبب کانگریس کو اتنی سیٹوں پر کامیابی حاصل ہوئی۔ ایسے میں مسلمانوں کا حق بنتا ہے کہ وہ ملت کے بیباک قائد آر روشن بیگ کو نائب وزیر اعلیٰ بنانے کا مطالبہ کیا جائے۔ وفد نے بتایا کہ کرناٹک میں لنگایت، وکلیگا، کربہ اور دیگر طبقات نے الگ الگ پارٹیوں کی حمایت کی جس کے سبب تمام جماعتوں میں اس کے نمائندے منتخب ہوکر آئے ہیں۔ اس کے برعکس مسلمانوں نے کانگریس کا ساتھ دیا یہی وجہ ہے کہ تمام 7 منتخب مسلم نمائندوں کا تعلق کانگریس پارٹی سے ہے۔ انہوں نے بتایا کہ روشن بیگ کو نائب وزیر اعلیٰ کے عہدے کے ساتھ دیگر منتخب مسلم نمائندوں کو بھی مناسب مقام فراہم کیا جائے۔ اگر مسلمانوں کو ان کا حق فراہم کیا گیا تو آنے والے لوک سبھا انتخاب میں مسلمان کانگریس کا ساتھ نہیں چھوڑیں گے۔ سیدہ زینب ایجوکیشن فاؤنڈیشن کے چیرمین عتیق احمد کی قیادت والے اس وفد نے کل ہند جمعےۃ المشائخ ساؤتھ زون کے صدر ڈاکٹر سید تاج الدین احمد قادری نوردریہ، صوفی ولی با رکن جمعےۃ الصوفیاء والمشائخ، سید معین پاشا قادری سجادہ نشین گدوال، سید خلیق اشرف اشرفی الجیلانی سکریٹری درگاہ حضرت سید مخدوم اشرف سمنانی کچھوچھہ شریف، سید قطب الدین شاہ قادی سجادہ نشین ورواکنڈہ، سید شاہ فیصل چشتی گدی نشین درگاہ اجمیر شریف، سید شاہ امان اللہ قادری رائچور، سید امین الدین باگسواری رائچور، شاہ محمد رفیع قادری رائچور، نجم الحیات شریف صدر منہاج القرآن انٹرنیشنل کرناٹک، ایوب انصاری سکریٹری منہاج القرآن بنگلور، سید محمد مہدی رضوی صدر ہندومسلم ایکتا کمیٹی وامن کمیٹی ممبئی اور راشد خان ممبئی کے علاوہ دیگر علماؤں ومشائخ موجود تھے۔ اس وفد نے لوک سبھا میں کانگریس کے قائد ملکارجن کھرگے، اے آئی سی سی جنرل سکریٹری اشوک گہلوٹ کے علاوہ اعلیٰ کمان کے کئی قائدین سے بھی ملاقات کرتے ہوئے جناب روشن بیگ کو نائب وزیر اعلیٰ کا عہدہ دینے کے ذریعہ مسلمانوں کے ساتھ انصاف کرنے کا مطالبہ کیا۔