بنگلورو،19؍مئی(ایس او نیوز) ریاستی حکومت کی طرف سے مجوزہ بنگلور میٹروریل پراجکٹ کے دوسرے مرحلہ میں شامل گوٹیگیرے ،ناگوار زیر زمین لائن میں شامل شیواجی نگر ، کنٹونمنٹ ریلوے اسٹیشن اور پاٹری ٹاؤن اسٹیشنوں کی تعمیر کے سلسلے میں آج وزیر برائے شہری ترقیات وحج جناب روشن بیگ نے بنگلور میٹرو ریل کارپوریشن کے منیجنگ ڈائرکٹر پردیپ سنگھ کھرولا سے تفصیلی بات چیت کی ۔ وکاس سودھا میں واقع اپنے دفتر میں انہوں نے مسٹر پردیپ سنگھ کھرولا اور بنگلور میٹروریل کارپوریشن کے دیگر اعلیٰ افسران کو طلب کرکے اس پراجکٹ کے سلسلے میں کی گئی پیش رفت کے بارے میں جانکاری حاصل کی۔ بتایاجاتاہے کہ مسٹر پردیپ سنگھ کھرولا نے وزیرموصوف کو تفصیلات دیتے ہوئے کہاکہ عنقریب گوٹیگیرے اور ناگوار سے بیک وقت اندرونی کھدائی کا سلسلہ شروع کردیا جائے گا۔ بنگلور میٹرو ریل کارپوریشن نے اس کام کیلئے افزود ٹینل بورنگ مشینیں متعین کرنے کا فیصلہ کیا ہے۔ انہوں نے بتایاکہ گوٹیگیرے ،شیواجی نگر ، پاٹری ٹاؤن، ٹیانری روڈ، عربک کالج اور ناگوار میں الگ الگ مقامات کی نشاندہی کی گئی ہے ،جہاں پر کھدائی کرکے ٹینل بورنگ مشینوں کو سطح زمین سے تقریباً 350 فیٹ نیچے اتارا جائے گا اور اس حصے میں تعینات ہونے والی تقریباً بارہ ٹینل بورنگ مشینیں ایک سال تک سرنگ کی کھدائی کاکام جاری رکھیں گی، شیواجی نگر علاقہ میں ٹینل بورنگ کی کھدائی کاکام چار سے پانچ ماہ تک چل سکتا ہے۔ انہوں نے بتایاکہ بنگلور میٹرو ریل کارپوریشن کی طرف سے کھدائی کے دوران بین الاقوامی سطح کے حفاظتی معیارات اپنائے جاتے ہیں ان مشینوں کی طرف سے کھدائی کے دوران سطح زمین پر موجود کسی بھی عمارت کو نقصان نہ پہنچے اس کیلئے تمام احتیاطی تدابیر اپنائی گئی ہیں۔ شیواجی نگر علاقہ میں چونکہ بہت ساری قدیم عمارتیں موجود ہیں، خاص طور پر بعض قدیم مذہبی مقامات بشمول مساجد اور مندر بھی شیواجی نگر کا حصہ ہیں۔ جناب روشن بیگ نے اس سلسلے میں بنگلور میٹروریل کارپوریشن کی طرف سے اٹھائے گئے احتیاطی تدابیر کے بارے میں دریافت کیا تو مسٹر پردیپ سنگھ کھرولا نے یقین دلایا کہ کسی بھی عمارت کو کوئی نقصان نہ پہنچے اس کا خاص طور پر خیال رکھا جائے گا۔ جناب روشن بیگ نے کہا کہ ناگوار ، گوٹیکیرے میٹروریل پراجکٹ کی جلد از جلد تکمیل سے اس علاقہ کے لوگوں کو آنے جانے میں کافی سہولت ہوجائے گی، اور شہر میں بالخصوص شہر کے قلب میں آنے والے شیواجی نگر علاقہ میں ٹریفک کے اژدھام کو قابو میں کرنے میں کافی مدد ملے گی۔