لوک سبھا انتخابات: حاجی پور سے رام ولاس پاسوان نہیں لڑیں گے الیکشن
نئی دہلی، 18 مارچ ( ایس او نیوز؍آئی این ایس انڈیا ) لوک سبھا انتخابات کے لئے بہار میں این ڈی اے کے درمیان سیٹوں کی تقسیم ہو گئی ہے۔لیکن ابھی امیدواروں کے ناموں کا اعلان نہیں ہو سکاہے۔ایل جے پی لیڈر چراغ پاسوان نے کہا کہ ہم نے اپنے امیدواروں کو منتخب کر لیا ہے لیکن مہاگٹھ بندھن میں چل رہے اندرونی اختلاف کی وجہ سے ابھی تک صورتحال فائنل نہیں ہو سکی ہے۔ذرائع سے ملی معلومات کے مطابق ایل جے پی نے سمستی پور سے رام چندر پاسوان کو ٹکٹ دیا ہے۔حاجی پور سے پشوپتی کمار پارس کو پارٹی کی ذمہ داری دی گئی ہے۔ جموئی سے چراغ پاسوان خود الیکشن لڑیں گے۔وہیں ویشالی لوک سبھا سیٹ سے ایم ایل سی دنیش سنگھ کی بیوی ویتا سنگھ کو ٹکٹ دیا گیا ہے اور نوادہ سیٹ سے سورج بھان سنگھ کی بیوی ویتا دیوی کو ٹکٹ دیا گیا ہے۔بتا دیں کہ رام ولاس پاسوان حاجی پور لوک سبھا سیٹ سے الیکشن لڑتے رہے ہیں لیکن اس بار انہوں نے الیکشن نہیں لڑنے کا فیصلہ کیا ہے۔پاسوان شاید راجیہ سبھا جائیں گے۔چراغ پاسوان جموئی سے الیکشن لڑنے کا اعلان کر چکے تھے، بیوی الیکشن لڑنا نہیں چاہتی ہیں، بھائی پشوپتی بہار حکومت میں وزیر ہے۔اس لیے رام ولاس پاس کی جگہ کون لے گا، اس پر قیاس آرائیوں کا دور چلتا رہا۔آپ کو بتا دیں کہ اتوار کو وششٹھ نارائن سنگھ نے پریس کانفرنس کر کے سیٹوں کی تقسیم کی معلومات دی تھی۔سیٹوں کی تقسیم کے لحاظ سے دیکھیں تو سیمانچل کی زیادہ تر سیٹوں پر جے ڈی یو الیکشن لڑے گی۔جس میں کشن گنج اور بھاگلپور بھی شامل ہے۔چھ سیٹیں رام ولاس پاسوان کی قومی لوک جن شکتی پارٹی (ایل جے پی) کو ملی ہے۔بہار کی کل 40 لوک سبھا سیٹوں میں سے اس وقت بی جے پی اور جے ڈی یو 17۔17 سیٹوں پر انتخاب لڑ رہی ہیں۔جبکہ چھ سیٹ حلیف پارٹیاں لوک جن شکتی پارٹی کو ملی ہیں۔