جموں و کشمیر میں تیسرے دن بھی مسلسل پاکستان کی طرف سے فائرنگ ، چھ اسکول بند
سرینگر ،23؍ اکتوبر(ایس او نیوز؍آئی این ایس انڈیا ) جموں و کشمیر میں لائن آف کنٹرول کے قریب ا ڑی سیکٹر میں آج تیسرے دن بھی ہندوستانی فوجی اہلکاروں اور پاکستانی فوجیوں کے درمیان رک رک کر فائرنگ کا تبادلہ ہوتا رہاجس سے متاثرہ علاقہ میں تعلیمی ادارے بند رکھنے پڑے ۔ فوج کے ایک افسر نے بتایا کہ فائرنگ میں بھارت کی جانب سے کسی جانی نقصان کی کوئی تازہ اطلاع نہیں ہے ۔ افسر نے کہا ہمارے اور پاکستانی فوجیوں کے درمیان اری سیکٹر کے لائن آف کنٹرول کے پاس آج صبح چھ بجے تک فائرنگ جاری رہی۔ ہفتہ کو کمل کوٹ علاقے میں لائن آف کنٹرول کے قریب بھارتی چوکیوں اور دیہات پر پاکستانی فوجیوں نے بلا اشتعال فائرنگ کی ۔ اس مبینہ فائرنگ میں دو خواتین کے زخمی ہونے کی اطلاع ہے ۔انہوں نے کہا کہ کل اسی سیکٹر میں پاکستان نے ایک بار پھر جنگ بندی کی خلاف ورزی کی جس کا بھارتی فوج نے منہ توڑ جواب دینے میں کوئی دریغ نہ کیا ۔دریں اثناء احتیاطاً حکام نے کنٹرول لائن کے قریب چھ اسکولوں میں تعلیم و تدریس کو موقوف رکھنے کا حکم دیا ہے ۔ انہوں نے بتایا کہ جن اسکولوں میں تعلیم و تدریس موقوف رکھنے کا حکم دیا گیا ہے وہ تعلیمی ادارے ڈولنجا، مدے ،جبالا ،کمان اور ساکی علاقوں میں واقع ہیں۔ واضح ہو کہ سرحد پر ہندو پاک میں باہمی گولہ باری اور بندوق کی مسابقت کی وجہ سے اکثر علاقوں میں نظم و نسق اور عوامی زندگی پر منفی اثرات مرتب ہوتے ہیں ۔